Shaı mıǵa jaqsy áser etedi – zertteý
NUR-SULTAN. QazAqparat – Eń kem degende aptasyna tórt ret shaı ishý mı baılanysynyń tıimdiligin arttyrady. Bul týraly zertteý Aging ǵylymı jýrnalynda jarııalandy.
Avtordyń aıtýynsha, shaıdyń paıdasy men zııany týraly zertteýlerdiń kóbi neıropsıhologııalyq ádisterge negizdelgen, al bul top neırovızýalıtsııa arqyly zertteý júrgizgen.
«Zertteýge qatysýshylar eki topqa bólindi. Bir topta shaıdy kóp ishetinder, al ekinshi topta shaıdy múldem ishpeıtinder nemese sırek ishetinder boldy. Aıta keterligi, birinshi toptaǵy 30 adam sońǵy jıyrma bes jylda eń kem degende aptasyna tórt ret shaı ishken. Olardyń jasy alpystan asady. Zertteý barysynda qatysýshylardyń densaýlyǵy, ómir salty men psıhologııalyq ahýaly eskerilgen, sondaı-aq olar neıropsıhologııalyq testiden ótken. Sonymen qatar, ár qatysýshynyń mıy magnıtti rezonansty tomografııa arqyly skanerlengen», dep jazylǵan maqalada.
Nátıjesinde shaıdy kóp ishetin toptaǵy adamdardyń mıyndaǵy neırondy baılanys tıimdiligi ekinshi topqa qaraǵanda jaqsyraq bolyp shyqqan.
«Mı bólikteriniń arasyndaǵy baılanys tıimdi bolǵan saıyn aqparatty óńdeý de jaqsy bolady», deıdi zertteý tobynyń basshysy Leı Fen. Onyń aıtýynsha, shaı kognıtıvti qyzmetterge de jaqsy áser etedi. Konıtıvti qyzmet pen mı qurylymy tyǵyz baılanysty bolǵandyqtan, endi ǵalymdar shaıdyń quramyndaǵy bıologııalyq belsendi zattardyń ıntellektige áserin zerttep kórmek.
