Shavkat Rahmonovtyń endigi jattyǵýlary sportty qoldaý qorynan qarjylandyrylady

ASTANA. QazAqparat – Shavkat Rahmonovtyń endigi jattyǵýlary sportty qoldaý qorynan qarjylandyrylady. Bul týraly Mádenıet jáne sport mınıstri Ashat Oralov áleýmettik jelidegi paraqshasynda jazdy, dep habarlaıdy QazAqparat.

«Búgin Qazaqstan sportynyń jarqyn juldyzdarynyń biri Shavkat Rahmonovpen jeke kezdestim. Bizdiń jaýjúrek sportshymyz birinen soń bir jeńiske jetip, UFC-di batyl qadamdarymen baǵyndyryp, otandastarynyń júregine maqtanysh sezimin syılap keledi.

Men Shavkatty jaqynda amerıkalyq Djeff Nılmen bolǵan jekpe-jektegi jeńisimen taǵy bir márte quttyqtadym jáne oǵan alǵys hat tabystadym. Sondaı-aq, onyń kelesi jekpe-jekterge daıyndalýy sportty qoldaý qorynan qarjylandyrylady.

Shavkat búkil álemge Qazaqstandy pash etti jáne osy qadamy úshin biz oǵan aıryqsha alǵysymyzdy jetkizemiz. Onyń UFC chempıondyq belbeýin jeńip alýyna tilektespin, tolaǵaı tabys tileımin», - dep jazdy mınıstr.