Shavkat Rahmonovtyń zaıyby tizgindegen kólik apaty: tergeý aıaqtalýǵa jaqyndady

ASTANA. KAZINFORM — Bıyl jazda Shavkat Rahmonovtyń zaıyby Almaty-Ekaterınbýrg trassasynda jol apatyna ushyrady.  Sol kólik apaty boıynsha isti tergeý aıaqtalýǵa jaqyndady. Bul týraly Іshki ister mınıstriniń orynbasary Sanjar Ádilov málim etti.

— Qylmystyq kodekstiń 345-babynyń 3-bóligi boıynsha (abaısyzda adam ólimine ákep soqqan is-áreket) is qozǵaldy. Qazirgi ýaqytta barlyq tergeý áreketteri aıaqtaldy. Endi sońǵy keshendi avtotehnıkalyq saraptama alýdy kútip otyrmyz. Sonyń nátıjesi boıynsha aıyp taǵý jáne isti sotqa jiberý týraly sheshim qabyldaımyz, — dedi S. Ádilov Senatta tilshiler suraǵyna jaýap bere otyryp.

Eske salsaq, bıyl 27 shildede saǵat 08:50–de «Almaty-Ekaterınbýrg» Respýblıkalyq mańyzy bar avtojolynyń 299 shaqyrymynda jol-kólik oqıǵasy boldy.

Almatyǵa bara jatqan «Toyota Land Cruiser 200» markaly kóliginiń júrgizýshisi rýldi basqara almaı, kólik aýdarylǵan. Jol-kólik oqıǵasynan eki adam qaıtys boldy. Sonymen qatar, osy jol apatynan keıin Shavkat Rahmonovtyń zaıyby men uly aýrýhanaǵa jetkizilip, dárigerlerdiń baqylaýynda boldy.