Shavkat Rahmonovtyń UFC-den ketetini ras pa

ALMATY. KAZINFORM – Shavkat Rahmonovtyń bapkeri onyń UFC-den ketetini týraly qaýesetke jaýap berdi.

Reseılik Telegram-arnalardyń biri qazaqstandyq sportshy Shavkat Rahmonovtyń UFC-den ketetini týraly aqparat taratty. Munyń ras-ótirigin agenttik tilshisi sportshynyń bapkerinen surap bildi.

Reseılik bloger Vladımır Kolos júrgizetin «Kolos» Telegram-arnasy bul jańalyqty birinshi bolyp jarııalady.

— Shavkat Rahmonov UFC-men qoshtasyp jatyr, — dep jazdy ol.

Blogerdiń jazbasyna qaraǵanda, ol qazir Las-Vegasta júr jáne 4 qazanda ótetin UFC 320 týrnırinen habar taratýdy josparlap otyr. Alaıda basqa naqty derekter aıtylmaǵan.

Kazinform tilshisi Shavkat Rahmonovtyń Dar Team komandasyndaǵy bapkeri Edýard Bazrovqa habarlasyp, mán-jaıdy surady.

— Shynymdy aıtsam, ózim eshteńe bilmeımin. Bul týraly bizde eshqandaı aqparat joq, — dedi ol.

Dar Team komandasynyń jetekshisi Baýyrjan Ótálıev agenttik tilshisine bergen jaýabynda Rahmonovtyń UFC-den ketetinin joqqa shyǵardy.

— Shavkat kún saıyn jattyǵyp júr. Bul — jaı ǵana qaýeset, — dedi ol.

Sondaı-aq komandanyń resmı paraqshasynda Shavkat Rahmonovtyń jattyǵý jasap, túrli ádisti pysyqtap júrgen sátteri túsirilgen vıdeo jarııalanǵan.

Aıta keteıik, osy ýaqytqa deıin jeńilip kórmegen Shavkat Rahmonov keıingi ret UFC oktagonyna 2024 jylǵy jeltoqsanda shyqqan edi. Ol jaraqatyna qaramastan, ırlandııalyq Ien Gerrıdi tóreshilerdiń sheshimimen jeńdi.

Al jýyrda DAR Team komandasynyń bas bapkeri Edýard Bazrov Betonmobile basylymyna bergen suhbatynda Shavkat Rahmonovtyń jaqyn ýaqytta oktagonǵa oralýy múmkin ekenin málimdegen edi.