Shavkat Rahmonov Jánibek Álimhanulynyń jattyqtyrýshysynan bokstyń qyr-syryn úırenip júr
ASTANA. KAZINFORM – Tanymal qazaqstandyq UFC sheberi Shavkat Rahmonov kezekti jattyǵý lagerin bastady. Qazirgi ýaqytta aralas jekpe-jek sheberi Qazaqstannyń eńbek sińirgen jattyqtyrýshysy Murat Sıqymbaevtyń jetekshiligimen soqqy berý ádisterin jetildirip jatyr.
«Shavkat Rahmonovpen soqqy tehnıkasymen jumys isteý týraly usynys túskende, oılanbastan kelistim. Birinshiden, burynǵy tárbıelenýshim, qazir daryndy jattyqtyrýshy Oraz Aldybaevtan bas tarta almadym, ekinshiden, zamanymyzdyń kórnekti jekpe-jek sheberin tárbıeleýge óz úlesimdi qosqym keldi. MMA-da soqqydan basqa, jekpe-jektiń tehnıkalyq jáne taktıkalyq arsenaly bolýy kerek. Shavkatpen aptasyna úsh ret jattyǵamyz. Basqa kúnderi Rahmonov kúres elementterine jáne kúsh jattyǵýlaryna nazar aýdarady. Shavkat – qyrýar jumys atqaratyn kásibı maman», – deıdi jattyqtyrýshysy.
Jattyqtyrýshynyń aıtýynsha, Shavkat Rahmonovpen jattyǵýdy bastamas buryn ol onyń MMA-daǵy barlyq jekpe-jegin qaıta qarap shyqqan.
«Shavkattyń kórsetkishteri keremet – 18-0 jáne onyń jeńisti serııasyn aldaǵy kóp jyldar boıy jalǵastyrýǵa múmkindigi bar. UFC-de tanymal bolǵanymen, men klassıkalyq, dástúrli sportty jaqtaımyn. Búkil ǵumyrymdy boksqa arnadym. Álem chempıony Jánibek Álimhanulyn daıyndadym. Árıne, Shavkat Rahmonovpen jumysty bastamas buryn onyń jekpe-jekterin jan-jaqty taldap kórdim», – deıdi Murat Sıqymbaev.
WBO jáne IBF tujyrymy boıynsha orta salmaqtaǵy álem chempıony Jánibek Álimhanuly (15-0, 10 KO) ESNews arnasyna bergen suhbatynda jazdyń ortasynda Las-Vegasta rıngke shyǵýdy josparlap otyrǵanyn rastaǵan edi.
