Shavkat Rahmonov UFC-diń bedeldi reıtınginen shyǵaryldy

ASTANA. KAZINFORM — Aralas jekpe-jek sportshysy, qazaqstandyq Shavkat Rahmonov endi salmaq dárejesine qaramastan UFC-diń úzdik 15 jaýyngeriniń qataryna kirmeıdi. 

Rahmonovty P4P reıtınginen shyǵarý Brazılııanyń Rıo-de-Janeıro qalasynda UFC-diń jeńil salmaqtaǵy burynǵy chempıony Charlz Olıveıranyń qatysýymen týrnır ótkennen keıin tirkeldi.

Brazılııalyq óz elindegi oktagonda Mateýsh Gamrotty qapy qaldyrdy. Bul jeńis oǵan UFC-degi úzdik 15 sportshy reıtıngine enýine múmkindik týǵyzdy.

Sońǵy birneshe aıdan beri R4R reıtınginde 15-orynda turǵan Shavkat Rahmonov ol tizimnen shyǵaryldy. Otandasymyz jyl basynan beri birde-bir jekpe-jek ótkizgen joq. Aýyr jaraqatyna baılanysty ol mamyr aıynda ota jasatty.

UFC-diń jartylaı orta salmaq reıtınginde Shavkat Rahmonov úzdik úshtiktegi ornyn saqtap qaldy.

Otandasymyz mansabynda 19 jekpe-jek ótkizip, barlyǵynda jeńiske jetti.

Eske salsaq, budan buryn Shavkat Rahmonovtyń bapkeri onyń UFC-den ketetini týraly qaýesetke jaýap berdi.