Shavkat Rahmonov Sanjar Táshkenbaıdy qylqyndyrý ádisimen jeńdi
ASTANA. KAZINFORM — UFC-de birde-bir ret jeńilmegen qazaqstandyq sportshy Shavkat Rahmonov bokstan álem chempıony Sanjar Táshkenbaımen sparrıng ótkizdi. Bul týraly Kazinform agenttiginiń tilshisi habarlaıdy.
Erejesiz jekpe-jek sheberi Shavkat Rahmonov tizesindegi aýyr jaraqattan ońalyp, jattyǵýdy qaıta kúsheıtip jatyr. DAR Team komandasy áleýmettik jelidegi paraqshasynda sportshynyń daıyndyǵynan beınejazba jarııalady. Bul joly «Nomad»-tyń «qarsylasy» bokstan eki dúrkin álem chempıony Sanjar Táshkenbaı boldy.
Beınejazbada ol jekpe-jekti parterge aýystyryp, boksshyǵa óziniń sheberligin kórsetti. Táshkenbaıǵa qylqyndyrý ádisin qoldanyp, jeńilgenin moıyndaǵan soń, birden bosatqan. Sanjar bolsa, jeńilgenine qaramastan kóńil kúıin túsirgen joq. Kerisinshe, sporttaǵy alǵashqy jolyn MMA-dan bastaǵanyn eske aldy.
Shavkat Rahmonov (19-0) úshin qyzý daıyndyqqa qaıta kirisý — jaraqattan aıyǵý kezindegi mańyzdy qadamnyń biri. Ol sońǵy jekpe-jegin 2024 jylǵy jeltoqsanda UFC 310 týrnırinde ótkizip, ırlandııalyq Ien Gerrıdi tize búktirdi. Onda tóreshiler jeńisti biraýyzdan Shavkatqa bergen edi. Osydan keıin sportshynyń tizesindegi jaraqaty qaıta asqynyp, eki ret ota jasatty. Qazir Rahmonovtyń jattyqtyrýshylar shtaby ony tolyqqandy daıyndyqqa beıimdep jatyr. Sportshynyń oktagonǵa qaıta oralýy kelesi jyldyń basyna josparlanyp otyr.
Sanjar Táshkenbaı úshin kásibı bokstaǵy debıýti qarsańynda bul sparrıngtiń mańyzy zor. Ol 28 tamyzda Astanada kásipqoı rıngtegi alǵashqy jekpe-jegin ótkizip, birinshi eń jeńil salmaqtaǵy IBF Asia nusqasy boıynsha bos turǵan chempıondyq ataqqa talasady.
Buǵan deıin qazaqstandyq MMA sportshysy Shavkat Rahmonovtyń 2026 jyly UFC-degi jekpe-jegin ótkize almaıtyny habarlanǵan edi.
Aıta ketelik Qazaqstandyq aralas jekpe-jek sheberi Shavkat Rahmonov oktagonǵa shyqpaýyna ne sebep bolǵanyn aıtqan edi.
Aqzat Jıenalına
