Shavkat Rahmonov pen Djeff Nıl jekpe-jegi salmaq aıyrmashylyǵyna qaramastan ótedi
ASTANA. QazAqparat – Erteń Las-Vegasta ótetin UFC 285 týrnıriniń aldynda oktagonǵa shyǵatyn qazaqstandyq Shavkat Rahmonov pen onyń qarsylasy amerıkalyq Djeff Nıldiń sońǵy salmaq ólsheý rásimi ótti, dep habarlaıdy QazAqparat tilshisi Sports.kz saıtyna silteme jasap.
Málim bolǵandaı, Sh. Rahmonovtyń qarsylasynyń salmaǵy shekti mejeden asyp ketti. Atap aıtqanda, tarazyǵa turǵan otandasymyzdyń salmaǵy 77,56 keli, al amerıkalyqtyń salmaǵy 79,37 keli boldy.
Bul rette UFC Djeff Nıldiń salmaǵy mejeden asyp túskenine qaramastan jekpe-jek ótetinin resmı málimdedi, sebebi Shavkat Rahmonov bas tartpaǵan. Alaıda, amerıkalyq sportshy gonararynyń 30 paıyzyn Shavkat Rahmonovqa beredi.
Eske salaıyq, keshe Shavkat Rahmonov baspasóz konferentsııasyn ótkizip, negizgi jekpe-jegi aldynda qarsylasymen kóz túıistirdi.
UFC reıtıngisiniń 9-ornynda turǵan Shavkat Rahmonov minsiz rekord ıegeri. Ol 16 ret jeńiske jetip, múldem jeńilmegen, oǵan qosa barlyq jekpe-jegi merziminen buryn aıaqtalǵan. «Nomad» UFC-de 4 aıqas ótkizdi. Djeff Nılge keler bolsaq, onyń qorjynynda 15 jeńis pen 4 jeńilis bar. Ol dıvızıon rangi týraly kestede 7-orynda tur.
Otandasymyz ben amerıkalyq arasyndaǵy tartysty jekpe-jek 5 naýryz kúni Astana ýaqyty boıynsha shamamen 9:40-ta bastalady.
