Shavkat Rahmonov memleketten qarjylandyrý aldy – mınıstr sportshymen kezdesti

ALMATY. QazAqparat – Erejesiz jekpe-jek sheberi Shavkat Rahmonovqa Sportty qoldaý qorynan qarjylandyrý bólinedi. Bul týraly Mádenıet jáne sport mınıstri Ashat Oralov málim etti, dep habarlaıdy QazAqparat.

«Búgin Qazaqstan sportynyń jarqyn juldyzdarynyń biri – Shavkat Rahmonovpen jeke kezdestim. Bizdiń jaýjúrek sportshymyz birinen soń biri jeńiske jetip, UFC-di batyl qadamdarymen baǵyndyryp, otandastarynyń júregine maqtanysh sezimin syılap keledi.

Men Shavkatty jaqynda amerıkalyq Djeff Nılmen bolǵan jekpe-jekte jeńisimen taǵy da quttyqtadym jáne oǵan alǵys hat tabystadym. Sondaı-aq ol kelesi jekpe-jekterge daıyndalý úshin Sportty qoldaý qorynan qarjylandyrylatyn bolady.

Shavkat búkil álemge Qazaqstandy pash etti jáne osy qadamy úshin biz oǵan aıryqsha alǵysymyzdy jetkizemiz. Onyń UFC chempıondyq belbeýin jeńip alýyna tilektespin, tolaǵaı tabys tileımin», - dep jazdy mınıstr Facebook-tegi jeke paraqshasynda.

Eske salaıyq, 5 naýryz kúni tańerteń Las-Vegasta (AQSh, Nevada shtaty) ótken UFC 285 týrnırinde Shavkat Rahmonov amerıkalyq Djeff Nıldi (15-5) býyndyrý tásilimen jeńdi.

Qazaqstandyq úshin bul óz mansabyndaǵy 17-shi jeńis boldy, sondaı-aq ol búkil jekpe-jekterin merziminen buryn aıaqtaǵan.

Jartylaı orta salmaqtaǵy reıtıngide Rahmonov 6-orynǵa kóterildi.