Shavkat Rahmonov qańtardaǵy UFC týrnırine qatyspaıdy — menedjer
ASTANA. KAZINFORM — Qazaqstandyq UFC sheberi Shavkat Rahmonovtyń ókili Denıel Rýbenshteın «Nomad» pen burynǵy aýstralııalyq chempıon Djek Della Maddalena arasyndaǵy jekpe-jek týraly aqparatty joqqa shyǵardy. Bul týraly Sports.kz saıty jazdy.
Sheteldik BAQ-ta Rahmonov pen Della Maddalena arasyndaǵy jekpe-jek qańtar aıynda josparlanyp jatqany habarlanǵan bolatyn. Degenmen, Rýbenshteın mundaı jekpe-jek tipti talqylanbaǵanyn aıtady.
— Bul múldem shyndyqqa janaspaıdy. DDM qarsylas retinde atalǵan joq, al Shavkat qańtarda oktagonǵa oralmaıdy, — dep jazdy ol áleýmettik jelide.
Buǵan deıin jelide Shavkat Rahmonov pen Maıkl Morales arasyndaǵy jartylaı orta salmaqtaǵy jekpe-jek ótýi múmkin ekeni týraly habar taraǵan. Eki sportshynyń da rekordtary 19-0.
Nurlan Tuıaqov
