Shavkat Rahmonov chempıondyq ataǵyn qorǵaıdy
NUR-SULTAN. QazAqparat - Orta salmaqtaǵy M-1 Global chempıony qazaqstandyq Shavkat Rahmonov 28 maýsym kúni elordada ótetin M-1 Challenge 102 týrnırinde chempıondyq ataǵyn qorǵaıdy. Bul týraly «BE STRONG PROMOTION» kompanııasynyń baspasóz qyzmetinen málim etti, dep habarlaıdy QazAqparat tilshisi.
«Kelisimshart talabyna sáıkes Shavkat Rahmonov chempıondyq ataǵyn qorǵaǵannan keıin UFC joǵary saıyskerler lıgasyna óte alady. Ol áýesqoılar arasynda eń jas álem chempıony atanyp, BATTLE OF NOMADS jáne M-1 Global halyqaralyq promoýshenderinde chempıondyq ataq ıelenip, MMA álemdik elıtasyna ený quqyǵyna laıyq boldy. Biz aldaǵy jekpe-jekti taǵatsyzdana kútemiz. Shavkat jeke bapkeri Baıan Janǵalovpen jekpe-jekke daıyndyqqa kirisip ketti. Aldyn ala aqparatqa sáıkes Shavkat Rahmonovtyń qarsylasy brazılııalyq Tıago Varejao bolmaq», - dedi Qazaqstannyń MMA birikken federatsııasynyń vıtse-prezıdenti Asylbek Dúısenov.
MMA-dan Qazaqstan quramasynyń bas bapkeri, Shavkat Rahmonovtyń jeke bapkeri Baıan Janǵalov shákirtiniń aldaǵy jekpe-jekke daıyndyǵyn joǵary baǵalap otyr.
«Bapkerlik mansap jolymda mundaı eńbekqor jáne tártipti sportshyny kezdestirgen emespin. Ol barlyq ýaqytta da ózgelerge qaraǵanda kóp jattyǵady. Bul jol da Shavkat 100 paıyz daıyndalady. Jattyǵý protsesinde aldyńǵy qatarly ǵylymı ázirlemelerdi qoldanamyz jáne únemi jetildirip otyrýǵa tyrysamyz», - dedi B.Janǵalov.
Eske sala ketsek, buǵan deıin Shavkat Rahmonovqa álemdegi eń mártebeli UFC promoýshen jekpe-jek ótkizýge usynys jasaǵanyn habarlaǵan bolatynbyz.
