Shavkat Rahmonov Aqtóbedegi sý tasqynynan zardap shekken bir otbasyǵa úı salyp beredi

AQTÓBE. QazAqparat – Qazaqstandyq aralas jekpe-jek faıteri, bul sport túrinen birde-bir jeńilis tappaǵan sportshy Shavkat Rahmonov Qobda aýdanynyń Qobda aýylynda bolyp, sý tasqynynan zardap shekken turǵyndarmen kezdesti. Bul týraly QazAqparat Aqtóbe oblysy ákiminiń baspasóz qyzmetine silteme jasap habarlaıdy.

«Naýryz meıramymen barshańyzdy quttyqtaımyn. Keremet kúnde 24 úıdiń qazyǵy qaǵylyp jatyr. Men de bul bastamaǵa óz úlesimdi qosamyn dep sheshtim. «Apat aıtyp kelmeıdi» deıdi. Synaqtarǵa moıymaı, jeńe bildińizder. Sizderge densaýlyq, baqyt tileımin. Tek alǵa!» - dedi Shavkat Rahmonov.

Buǵan deıin habarlaǵanymyzdaı, búgin Aqtóbe oblysynyń Qobda aýdanynda sý tasqynynan zardap shekkender úshin salynatyn úılerdiń qazyǵy qaǵyldy. Jańa úıler Qobda aýylynyń «Jańaqonys» shaǵyn aýdanynda boı kóteredi. Qurylysy bastalǵan 24 úı tótenshe jaǵdaıǵa qarastyrylǵan bıýdjetke salynady. Olar bıylǵy 1 maýsymda paıdalanýǵa beriledi dep josparlanyp otyr.

Aıta ketsek, 21 naýryz kúni Astanadaǵy EXPO alańynda ótken merekelik shara barysynda taıaýda ǵana UFC aıasyndaǵy jekpe-jeginde jeńiske jetken Shavkat Rahmonov Memleket basshysy Qasym-Jomart Toqaevpen kezdesken bolatyn. Prezıdent sportshyny jýyrda jeke qabyldaıtynyn aıtty.