Shavkat Rahmonov Aqtaýda jastarmen kezdesti

AQTAÝ. QazAqparat - Aqtaýda M1 Global belbeý ıegeri, UFC jaýyngeri Shavkat Rahmonov 1000-ǵa jýyq jas býyn ókilderimen kezdesý ótkizdi, dep habarlaıdy QazAqparat tilshisi.

Kezdesý barysynda esirtkige elitýdiń zalaly men ýytty ónimdi tutyný saldary jaıly áńgime órbip, sportshy jastardy salaýatty ómir saltyn ustanýǵa úndedi.

Shavkad Rahmonov elimizdiń túkpir-túkpirin aralap, sportsúıer jankúıerlermen kezdesýler uıymdastyryp, jastardy jigerlendirýge sheshim qabyldaǵan.

«Iá, sport salasymen bala kezden beri aınalysyp kelemin. Sportshy adam mindetti túrde tártipke baǵynyp, kúndelikti ózin tárbıeleýi qajet. Sonymen qatar, adamgershilik qasıetterdi alǵa qoıyp, qarapaıym ári adal bolǵany abzal. Úlkenderdiń sózine qulaq asyp, olarǵa erekshe qurmet kórsetý kerek. Sondaı-aq, kóshede tóbelesip ýaqytty zaıa ketirmeı, sportqa qatysyp, eliniń kók týyn jelbiretip, abyroıyn ózge memleketterdiń aldynda asqaqtatýy tıis» -dedi Shavkat Rahmonov.

Baspasóz májilisi barysynda Shavkat Rahmonovtyń jankúıerleri kókeıinde júrgen suraqtaryn qoıdy. Tanymal qazaqstandyq UFC jaýyngeri naǵyz sportshynyń tulǵalyq qasıetteri jóninde oı sabaqtap, tárbıelik máni zor keńesterimen bólisip, kásibı turǵydan baǵyt-baǵdar nusqady.