Shavkat nege ırlandııalyq qarsylasyn áreń jeńdi

Jeltoqsannyń basynda otandasymyz Shavkat Rahmonov UFC 310 jarysynda ırlandııalyq Ien Machado Garrımen jekpe-jekke shyǵyp, jeńiske jetti.

Alaıda kezdesýdiń sońyna qaraı ırlandııalyq sportshy Shavkatqa qylqyndyrý ádisin jasap, jankúıerlerdi bir dúr silkindirgen edi. ıAǵnı, otandasymyz sál shydamdylyq kórsetpegende jeńiliske ushyraýy múmkin edi.

Jekpe-jektiń nelikten bulaı aýyr ótkenin, otandasymyz nege kezdesýdi ýaqytynan buryn aıaqtaı almaǵanyn Kazinform tilshisine Shavkat Rahmonovtyń ókili Baýyrjan Ótálıev aıtyp berdi.

Onyń sózinshe, Shavkattyń jekpe-jekti aýyr ótkizýiniń kóptegen sebebi bar.

– Amerıkaǵa usharǵa deıin Shavkat aıaǵynan jaraqat aldy, medıaldy kollateraldi baılamy jyrtylǵan eken. Biraz ýaqyt gıps taǵyp, sekire de almaı qalǵan bolatyn.

Amerıkaǵa kelgennen keıin qarsylas bolady dep kútilgen Belal Muhamedtiń jaraqat alyp, jekpe-jekten bas tartyp jatqanyn estidik. Osynyń bári Shavkattyń kóńil-kúıine keri áser etti. Aıaqtan jaraqat alǵany azdaı, jospar buzyldy, – deıdi Dar Pro Team komandasynyń jetekshisi.

Ótálıevtiń aıtýynsha, Belal Muhamed jekpe-jekten bas tartqan soń 20 kún boıy qazaqstandyq faıter kimniń qarsylas bolatynyn bile almaǵan.

– Biz jattyǵyp jatqan zal tym úlken boldy, onda ártúrli ult ókilderi toptasqan. Zaldyń ishi óte ystyq, ınfektsııalyq turǵydan qaýip bar edi. Qarsylastyń kim bolaryn bilmeı júrgenimizde Shavkattyń denesi jattyǵýlardan keıin titirkenip, ınfektsııanyń alǵashqy belgileri baıqalǵandaı boldy. Dárigerler bizge osy kezeńnen ótý úshin antıbıotıkter ishýdi usyndy. Denesinde sál álsizdik baıqalsa, adam qansha tyryssa da 100 paıyzdyq qalypta jattyǵý jasaı almaıdy. Fızıkalyq daıyndyqty ustap turyp, tózimdilikti arttyrý úshin Shavkat amalsyz antıbıotıkter qabyldady, – deıdi ol.

Sondaı-aq Baýyrjan Ótálıev Shavkat ırlandııalyqpen kezdesýge aıaǵynan alǵan jaraqaty áli tolyq aıyqpaǵan kúıde shyqqanyn alǵa tartty.

– Alǵa qaraı tike júrse sezilmeıdi, biraq janymen qımyldaı bastasa aıaǵy aýyratyn. Jekpe-jek aıaqtalǵannan keıin saraptap qarasaq, Shavkat fızıkalyq daıyndyǵynyń 60-70 paıyz deńgeıimen ǵana shyqqan eken. Onyń jaraqatynan qarsylas ta habarsyz bolmaǵany anyq. Osyǵan qaramastan, qıynǵa soqqan jekpe-jekte Shavkat úmitti aqtady, – dep túıindedi ol.

Suhbattyń tolyq nusqasyn myna jerden oqı alasyzdar.