Shavkat Mırzıeev Buharada «Ortalyq Azııa — Reseı» ónerkásiptik habyn qurýdy usyndy
TAShKENT. KAZINFORM — «Ortalyq Azııa — Reseı» sammıtine qatysqan Ózbekstan prezıdenti Shavkat Mırzıeev aımaq elderi resmı Máskeýmen ekonomıkalyq seriktestikti tereńdetýge múddeli ekenin málim etti, dep habarlaıdy Kazinform agenttiginiń menshikti tilshisi.
Sóz basynda Shavkat Mırzıeev óńirler arasyndaǵy strategııalyq seriktestiktiń joǵary deńgeıge shyqqanyn aıta kele, «Ortalyq Azııa — Reseı» formatynyń mańyzyna toqtaldy.
— Reseı biz úshin negizgi strategııalyq seriktes jáne odaqtas bolyp qala bermek. Bizdi ortaq tarıh, ǵasyrlar boıy qalyptasqan baılanys, halyqtarymyzdyń mádenı jaqyndyǵy biriktiredi. Osy oraıda, ádemdik geosaıası shıelenister, yqtımal daǵdarystar jáne jańa syn-qaterler «Ortalyq Azııa — Reseı» formatynyń mańyzyn arttyra tústi, — dedi Ózbekstan basshysy.
Shavkat Mırzıeev atalǵan format aıasynda 2027 jylǵa deıingi birlesken is-qımyl josparyn ózektendire túsý qajettigin aıtty. Bul rette resmı Tashkent tereń zerdeleý arqyly mańyzdy baǵyttardy anyqtap, tıisinshe «Jol kartalaryn» ázirleýdi usyndy.
Sondaı-aq, Ózbekstan prezıdenti tapsyrmalardy ýaqtyly oryndaý, iri jobalardy jedel ári sapaly júzege asyrý úshin úkimet basshylarynyń orynbasarlary deńgeıindegi Úılestirý keńesin qurý bastamasyn kóterdi.
— Ortalyq Azııa Reseımen ekonomıkalyq seriktestikti tereńdetýge múddeli. Biz bul baǵytqa basymdyq beremiz jáne birlese jumys isteýge daıynbyz. Sondyqtan usynyp otyrǵan Úılestirý keńesi sheńberinde taýar aınalymyn arttyrýǵa baǵyttalǵan keshendi sharalardy ázirleý oryndy dep sanaımyz. Ol úshin taýarlardy ózara naryqtarǵa shyǵarý jáne kedendik rásimderdi ońtaılandyrýǵa nazar aýdarý qajet, — dep toqtaldy Ózbekstan prezıdenti.
Shavkat Mırzıeev ónerkásip salasyn damytýǵa qatysty da usynys bildirdi. Ol atalǵan baǵyttaǵy yntymaqtastyqty ilgeriletý úshin Buhara qalasynda «Ortalyq Azııa — Reseı» ónerkásiptik habyn qurý qajettigin aıtty. Oǵan resmı Tashkent jan-jaqty qoldaý kórsetpek.
Sondaı-aq, Ózbekstan basshysy energetıka salasyndaǵy yqpaldastyqqa da erekshe toqtaldy. Shavkat Mırzıeevtiń pikirinshe, birlesken jobalardy ázirleý jáne olardy iske asyrý maqsatynda «Ortalyq Azııa men Reseıdiń energetıkalyq áriptestigi» keshendi baǵdarlamasyn qabyldaý qajet.
Eske salaıyq, Prezıdent Qasym-Jomart Toqaev ekinshi «Ortalyq Azııa — Reseı» sammıtine qatysa otyryp, birqatar mańyzdy bastama kóterdi. Atap aıtqanda, Memleket basshysy Qazaqstan men Reseı arasynda astyq óńdeýdiń birlesken klasterin qurýdy usyndy. Munymen birge ol «Ortalyq Azııa — Reseı» formatyndaǵy alǵashqy rektorlar forýmyn elimizde ótkizý bastamasyn kóterdi.