Shavkat Mırzıeev Ortalyq Azııaǵa ortaq Qyzyl kitap ázirleýdi usyndy
ASTANA. KAZINFORM — Ózbekstan Prezıdenti Shavkat Mırzıeev Ortalyq Azııa elderine tabıǵatty qorǵaý baǵytyndaǵy birlesken naqty tetikterdi iske qosýdy usyndy.
Osy turǵyda memleket basshysy óńirge ortaq Qyzyl kitap ázirleý bastamasyn kóterdi. Onyń aıtýynsha, bul qujat sırek kezdesetin jáne joıylyp bara jatqan túrlerdi tirkeýmen ǵana shektelmeı, tabıǵatty qorǵaý salasyndaǵy úılesimdi is-qımyldy qamtamasyz etetin pármendi quralǵa aınalýy tıis.
— Bul úderisti Tashkent qalasyndaǵy Halyqaralyq tabıǵatty qorǵaý odaǵynyń óńirlik keńsesi úılestirýi múmkin. Osy arqyly elderdiń ǵylymı áleýeti biriktirilip, tájirıbe almasý júıeli jolǵa qoıylady, — dedi Shavkat Mırzıeev.
Sonymen qatar, Prezıdent óńirdegi ekologııalyq qaterlerdiń aldyn alý úshin ınstıtýtsıonaldyq negizdi kúsheıtý qajet ekenin atap ótti. Osy maqsatta ol «Jasyl ýnıversıtet» janyndaǵy shóleıttenýge qarsy kúres, qurǵaqshylyqtyń aldyn alý jáne shańdy daýyldy erte eskertý ortalyǵyna óńirlik mártebe berýdi usyndy. Bul bastama jerdiń tozýyn baqylaý tetikterin jetildirýge múmkindik beredi.
Buǵan deıin Ózbekstan Prezıdenti Ortalyq Azııada klımattyq ózgerister jahandyq ortasha deńgeıden jyldam júrip, óńirde qurǵaqshylyq, muzdyqtardyń erýi jáne sý tapshylyǵy kúsheıip jatqanyn málimdegeni habarlanǵan edi.
