Shavkat Mırzıeev Ortalyq Azııa narkologtarynyń qaýymdastyǵyn qurýdy usyndy
TAShKENT. KAZINFORM – 2025 jyly Ózbekstanda 3,5 tonnaǵa jýyq esirtki tárkilendi. Bul týraly Ózbekstan prezıdenti Shavkat Mırzıeevtiń «Qoǵam densaýlyǵy men qaýipsizdigi úshin transulttyq esirtki qaterlerine qarsy is-qımyl» halyqaralyq forýmynyń qatysýshylaryna joldaǵan hatynda aıtylǵan, dep habarlaıdy Kazinform agenttiginiń Tashkenttegi menshikti tilshisi.
Keıingi jyldary kórshiles elde esirtki qylmystaryn anyqtaý — 2,5, al tárkilengen zattardyń kólemi 2 esege ósti.
— Ótken jyly quqyq qorǵaý organdary 15 myńnan astam esirtki qylmysyn ashty. Sondaı-aq, 3,5 tonnaǵa jýyq esirtki tárkilenip, 14 jasyryn zerthana men 72 iri ınternet-dúkenniń qyzmeti toqtatyldy, — delingen hatta.
Ózbekstan basshysy esirtki qylmysymen kúresti kúsheıtýge baǵyttalǵan birneshe bastama kóterdi. Atap aıtqanda, ol barlyq múddeli elderdiń jaýapty organdary derekqorlaryn biriktirý arqyly Biryńǵaı tsıfrlyq platforma qurýdy usyndy.
Buǵan qosa Shavkat Mırzıeev sıntetıkalyq esirtkige táýeldi naýqastardy emdeýdiń zamanaýı ádisteri men standarttaryn birlesip ázirleý maqsatynda turaqty dıalog alańyn jasaqtaý qajettigin basa aıtty.
Munymen birge nashaqorlardy ońaltý baǵytynda tájirıbe almasý úshin Ortalyq Azııa narkologtarynyń qaýymdastyǵyn qurý usynyldy. Ózbekstan prezıdenti bul uıymnyń bas keńsesin Samarqand qalasynda ornalastyrýǵa daıyn ekenin jetkizdi.
Toqtala keteıik, bul kúnderi Samarqandta «Qoǵam densaýlyǵy men qaýipsizdigi úshin transulttyq esirtki qaterlerine qarsy is-qımyl» halyqaralyq forýmy ótip jatyr.
Eske salaıyq, bıyl alǵashqy eki aıda Ózbekstannyń quqyq qorǵaý organdary 8 zerthanany anyqtap, 375 keli esirtki tárkiledi.
Buǵan deıin Ózbekstan Qaýipsizdik keńesi hatshysynyń orynbasary Bahodır Tashmatov Ortalyq Azııa arqyly jylyna 90 tonnaǵa jýyq geroın ótetini jaıly málimdep edi.
Munymen qatar Esirtkige qarsy kúres jónindegi Ortalyq Azııa úılestirý ortalyǵynyń keńsesi Astanaǵa kóshirilmek.
