Shavkat Mırzıeev Qasym-Jomart Toqaevty Quryltaı saılaýynyń sátti ótýimen quttyqtady
ASTANA. KAZINFORM — Ózbekstan Prezıdenti Shavkat Mırzıeev Qazaqstan Respýblıkasynyń Prezıdenti Qasym-Jomart Toqaevqa hat joldap, halyqaralyq standarttar men demokratııalyq qaǵıdattarǵa saı eldiń jańarǵan Parlamenti — Quryltaıǵa baılanysty ótken saılaýdyń sátti uıymdastyrylýymen shyn júrekten quttyqtady.
Ózbekstan basshysy bul tarıhı oqıǵa Qazaqstannyń saıası júıesin jetildirýdiń, memlekettik basqarý tıimdiligin arttyrýdyń jáne Parlamenttiń rólin aıtarlyqtaı kúsheıtýdiń jańa kezeńi bastalǵanyn kórsetetinin atap ótti.
Saılaýǵa azamattardyń belsendi qatysýy Qasym-Jomart Toqaevtyń basshylyǵymen júzege asyrylyp jatqan jáne Qazaqstannyń turaqty damýyn qamtamasyz etýge, sondaı-aq onyń halyqaralyq arenadaǵy bedeli men yqpalyn odan ári arttyrýǵa baǵyttalǵan aýqymdy konstıtýtsııalyq jáne qoǵamdyq-saıası reformalardy halyqtyń keńinen qoldaıtynyn aıqyn kórsetkeni aıtyldy.
Ózbekstan Prezıdenti baýyrlas qazaq halqymen ǵasyrlar boıy dostyq jáne tatý kórshilik qarym-qatynastar baılanystyryp kele jatqanyn atap ótip, Qazaqstanda búginde júzege asyrylyp jatqan aýqymdy ózgeristerdiń joǵary nátıjelerine Ózbekstanda shyn júrekten qýanyshty ekenin jetkizdi.
Sondaı-aq Ózbekstan men Qazaqstan parlamentteri arasyndaǵy tyǵyz yntymaqtastyq eki dostas eldiń strategııalyq seriktestigi men odaqtastyq qatynastary aıasynda jańa sapaly deńgeıge kóteriletinine senim bildirildi.
Sóz sońynda Prezıdent Shavkat Mırzıeev Qasym-Jomart Toqaevqa zor densaýlyq, amandyq jáne memlekettik qyzmetinde úlken jetistikter, al baýyrlas Qazaqstan halqyna beıbitshilik pen órkendeý tiledi.
Budan buryn Sadyr Japarov Qasym-Jomart Toqaevty Quryltaı saılaýynyń sátti ótýimen quttyqtaǵan edi.
Sonymen qatar Ilham Álıev Qazaqstandaǵy Quryltaı saılaýyna qatysty quttyqtaýyn jetkizdi.
