Shavkat Mırzıeev Qasym-Jomart Toqaevpen beıresmı kezdesý ótkizý úshin Almatyǵa kele jatyr
TAShKENT. KAZINFORM — Memleket basshysy Qasym-Jomart Toqaevtyń shaqyrýymen Ózbekstan prezıdenti Shavkat Mırzıeev jumys saparymen Almatyǵa attandy, dep habarlaıdy Kazinform agenttiginiń menshikti tilshisi.
Sapar barysynda Qasym-Jomart Toqaev pen Shavkat Mırzıeev beıresmı kezdesý ótkizedi. Onyń aıasynda qazaq-ózbek qarym-qatynasyn tereńdetý múmkindikteri, halyqaralyq jáne óńirlik deńgeıdegi ózekti máseleler talqylanady.
Eske salaıyq, keıingi ret Memleket basshysy Qasym-Jomart Toqaev pen Ózbekstan prezıdenti Shavkat Mırzıeev byltyr sáýirde Hıýa qalasynda beıresmı kezdesý ótkizgen edi. Onyń barysynda resmı Astana men Tashkent arasyndaǵy strategııalyq seriktestik pen odaqtastyqty odan ári nyǵaıtý máseleleri qaraldy.
Qosa ketsek, bıyl qańtar-aqpan aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy. Osy aralyqta elimiz kórshiles memleketke 473 mln dollardyń taýaryn eksporttaǵan.
Sonymen qatar, Qazaqstan men Ózbekstan ózara taýar aınalymyn 10 mlrd dollarǵa jetkizýge múddeli. Atalǵan kórsetkishke qol jetkizý úshin Qazaqstan men Ózbekstan arasynda qosymsha 4 saýda dálizi ashylýy múmkin.
Buǵan qosa, taıaýda Shavkat Mırzıeev Qazaqstanmen birlesip jasyl energııany eksporttaý kelisimin maquldady.