Shavkat Mırzıeev Izraıl men Palestına qaqtyǵysyna qatysty taǵy da málimdeme jasady
Ekonomıkalyq yntymaqtastyq uıymynyń (EYU) kezekti sammıtinde Ózbekstan Respýblıkasynyń Prezıdenti Shavkat Mırzıeev Gaza sektoryndaǵy jaǵdaıǵa baılanysty taǵy da málimdeme jasady, dep habarlaıdy Kazinform agenttiginiń menshikti tilshisi.
«Beıbitshilik pen qaýipsizdikke eleýli jahandyq qaýip tóndiretin Taıaý Shyǵystaǵy Palestına-Izraıl qaqtyǵysy bárimizdi alańdatady. Ókinishke qaraı, beıbit turǵyndar, áıelder, balalar men qart adamdar qandy qaqtyǵystyń qurbany bolyp jatyr. Shıelenistiń aýqymy keńeıip bara jatqany baıqalady. Bul qaıshylyqtyń iri qaqtyǵysqa aınalýyna jol bermeý kerek. Biz taraptardy soǵys qımyldaryn dereý toqtatýǵa, beıbit kelissózderdi bastaýǵa jáne aqylǵa qonymdy ortaq sheshimge kelýge shaqyramyz. Biz taǵy da óz ustanymymyzdy bildirgimiz keledi – Palestına halqy Birikken Ulttar Uıymynyń qararlarymen rastalǵan óziniń táýelsiz memleketin qurýǵa quqyly», - dep málim etti Shavkat Mırzıeev.
Eske sala keteıik, buǵan deıin Ózbekstan Prezıdenti Gaza sektorynyń turǵyndaryna kómek retinde 1,5 mln dollar bóletinin aıtyp edi. Shavkat Mırzıeev ol joly da eki tarapty qaqtyǵys qımyldaryn toqtatýǵa jáne janjaldy beıbit jolmen sheshýge shaqyrdy.
Sondaı-aq, 3 qarashada Astanada ótken Túrki memleketteri uıymynyń H sammıtinde Shavkat Mırzıeev TMU elderin Palestına máselesi boıynsha birlesken ustanym kórsetýge shaqyrǵan edi.
