Shavkat Mırzıeev Ázerbaıjanǵa qarsy jasalǵan áreketti qatań aıyptady
TAShKENT. KAZINFORM — Ózbekstan basshysy Shavkat Mırzıeev Ázerbaıjan prezıdenti Ilham Álıevpen telefon arqyly sóılesti, dep habarlaıdy Kazinform agenttiginiń Tashkenttegi menshikti tilshisi.
Áńgime basynda Shavkat Mırzıeev Ázerbaıjanǵa jasalǵan dron shabýylyn qatań aıyptap, zardap shekkenderdiń tez saýyǵyp ketýine tilektestik bildirdi.
Sondaı-aq, prezıdentter Taıaý Shyǵystaǵy qaqtyǵystyń kúrt shıelenisýi beıbit turǵyndar arasyndaǵy qurbandar sanynyń artýyna ákep soqtyratynyna alańdaýshylyq bildirdi.
Ózbekstan basshysy qasıetti Ramazan aıynda bolyp jatqan osyndaı oqıǵalar adamzattyń ortaq qundylyqtaryna, memleketterdiń aýmaqtyq tutastyǵyn qamtamasyz etetin halyqaralyq quqyq qaǵıdattaryna qaıshy ekenin basa aıtty.
Óz kezeginde Ázerbaıjan prezıdenti Shavkat Mırzıeevke qıyn kezeńde dostyq qarym-qatynas tanytyp, qoldaý kórsetkeni úshin alǵys bildirdi.
Eske salsaq, 1 naýryzdan beri eldiń Syrtqy ister mınıstrligi Taıaý Shyǵys memleketterinen 9 361 ózbekstandyqty evakýatsııalady.
Buǵan deıin habarlaǵanymyzdaı, Ózbekstan Taıaý Shyǵystaǵy shıelenistiń iri qaqtyǵysqa ulasýyna alańdaýly.
4 naýryzda Ózbekstan prezıdenti Shavkat Mırzıeev Taıaý Shyǵystaǵy qaqtyǵysqa baılanysty jaýapty mınıstrlikke eldiń qorǵanys áleýetin nyǵaıtýdy tapsyrdy.
28 aqpanda Prezıdent Qasym-Jomart Toqaev Qaýipsizdik Keńesiniń Hatshysy Ǵızat Nurdáýletovke Taıaý Shyǵystaǵy ahýaldyń shıelenisýine baılanysty qaýipsizdik jóninde tapsyrma berdi.
Sondaı-aq 4 naýryzda Memleket basshysy Qasym-Jomart Toqaev kúshtik qurylymdarǵa ınfraqurylym qaýipsizdigin baqylaýdy tapsyrdy.
