Shavkat Mırzıeevpen barlyq máselede kózqarasymyz ortaq - Qasym-Jomart Toqaev
TAShKENT. ÓzA-QazAqparat - Ózbekstannyń «ÓzA» ulttyq aqparat agenttigine suhbat bergen QR Prezıdenti Qasym-Jomart Toqaev ózbek basshysy Shavkat Mırzıeevpen barlyq máselede kózqarasy ortaq ekenin jetkizdi, dep habarlaıdy QazAqparat.
«Shavkat Mıromonuly - Qazaqstan Prezıdenti laýazymyna kirisken kezimde birinshi bolyp quttyqtaǵan Memleket basshylarynyń biri. Jyly sózderi úshin shynaıy rızashylyǵymdy bildiremin. Ózbek kóshbasshysynyń Elbasymyzdyń atyna aıtylǵan izgi tilegi de - bizdiń elge degen sheksiz qurmetiniń dáleli dep sanaımyn. Prezıdent Shavkat Mırzıeev Ózbekstanda aýqymdy ózgeristerdi júzege asyrý jáne elderińizdi zamanaýı, halyqaralyq arenada básekege qabiletti memleketke aınaldyrýda tarıhı mıssııany óz moınyna alyp otyr», - dedi Qasym-Jomart Toqaev.
QR Prezıdenti Shavkat Mıromonulynyń memlekettik basqarý júıesin birtindep jetildirý, ekonomıka men qarjy sektoryn yryqtandyrý, ózbek halqy ómiriniń barlyq salasyn jańǵyrtý baǵytynan buljymaýy naǵyz qyzyǵýshylyq pen shynaıy qurmet týǵyzatynyn basa aıtty.
«Shavkat Mıromonuly óziniń búkil kúsh-jigerin, bilimi men tájirıbesin alǵa qoıǵan maqsattarǵa qol jetkizýge arnaıtyndyǵyna kezdesý barysynda kóz jetkizdim. 2017 jyly Qazaqstan Parlamenti Senatynyń delegatsııasyn basqaryp, Tashkentke saparmen kelgenimde aıtarlyqtaı tolyqqandy áńgimelesý boldy. Jeke óz basym Ózbekstan basshysynyń eldi damytýdyń barlyq negizgi baǵyttaryndaǵy strategııalyq tásilderin, óńirdegi jáne álemdegi ahýaldy tereń túsine bilýin qadir tutamyn. Onymen ekijaqty damýdyń barlyq máselelerinde kózqarasymyz ortaq. Bul óte mańyzdy. Bizdiń aramyzda oryn alǵan senimdi ári turaqty baılanystar baýyrlas qazaq-ózbek qarym-qatynasyn odan ary tereńdete túsetinine senimim mol», - dedi Memleket basshysy.
