Shavkat Mırzıeev tikushaq apatyna baılanysty QR Prezıdentine kóńil aıtty
NUR-SULTAN. QazAqparat - Ózbekstan Respýblıkasynyń Prezıdenti Shavkat Mırzıeev Qyzylorda oblysyndaǵy tikushaq apatyna baılanysty QR Prezıdenti Qasym-Jomart Toqaevqa kóńil aıtý jedelhatyn joldady, dep habarlaıdy «QazAqparat» HAA ÓR prezıdentiniń saıtyna silteme jasap.
«Qyzylorda oblysyndaǵy Qazaqstan Respýblıkasy Qarýly kúshteri áskerı tikushaǵynyń apatynan adamdardyń mert bolýy jaǵdaıyn zor kúızelispen qabyldadym. Orny tolmas qaıǵyǵa ortaqtasamyn jáne qaza bolǵandardyń týystary men jaqyndaryna kóńil aıtqanymdy jetkizýińizdi suraımyn», - delingen jedelhatta.
Eske salaıyq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyrady.Qorǵanys mınıstrliginiń aqparatyna sáıkes, atalǵan tikushaq Aqtaý qalasynan Shymkentke bet alǵan 4 áskerı tikushaq quramynda bolǵan. Barlyq ekıpaj múshesi - 13 adam qaza tapty.
Qorǵanys mınıstrligi qaza tapqan áskerı qyzmetshilerdiń esimderi men fotosýretterin jarııalady.
