Shavkat Mırzıeev Ózbekstan prezıdenttigine úmitker retinde maquldandy
ASTANA. QazAqparat - Ózbekstan basshysy mindetin ýaqytsha atqarýshy Shavkat Mırzıeevtiń kandıdatýrasy el prezıdenti saılaýyna qatysý úshin maquldandy.
"Ózbekstan premer-mınıstriniń kandıdatýrasy «budan buryn pleným usynǵan partııamyzdyń atynan prezıdent saılaýyna qatysatyny biraýyzdan bekitildi", dep habarlady RBK Ózbekstan Lıberaldy-demokratııalyq partııasynyń (ÓLDP) ókiline silteme jasap.
ÓLDP ókiliniń aıtýynsha, taıaý ýaqytta partııa tirkeý úshin Ortalyq saılaý komıssııasyna kandıdat týraly málimetterdi usynady.
Ózbekstan Prezıdenti Islam Karımov 2 qyrkúıekte 79-ǵa qaraǵan shaǵynda ınsýlt alyp, qaıtys boldy. Buǵan deıin premer-mınıstr qyzmetin atqarǵan Shavkat Mırzıeev el prezıdentiniń ýaqytsha mindetin atqarýshy bolyp taǵaıyndaldy.
Qyrkúıektiń basynda Ózbekstan Ortalyq saılaý komıssııasy osy jyldyń 4 jeltoqsanynda el prezıdentiniń saılaýyn ótkizý týraly sheshim qabyldady. Konstıtýtsııaǵa sáıkes, eger prezıdent óz mindetterin oryndaı almaǵan jaǵdaıda, jańa saılaý úsh aı ishinde ótýi tıis. Prezıdent mindetin zań boıynsha senat tóraǵasy oryndaýy qajet. Qazir Ózbekstanda bul laýazymda Nıgmatýlla ıÝldashev otyr. Budan buryn «RIA Novostı» habarlaǵandaı, ol prezıdent mindetin atqarýdan ózdiginen bas tartty.
