«Shattyq» festıvalinde 500-ge jýyq jas daryn baǵyn synaýda
Jyl saıyn Elorda kúnine oraılastyrylǵan «Shattyq» festıvalinde baǵyn synaý úshin Qazaqstannan jáne kórshi memleketterden daryndy jastar - ánshiler, bıshiler Astanaǵa jınalady. Festıval geografııasy jyldan-jylǵa keńeıip keledi.
Festıval uıymdastyrýshysy Qarlyǵash Ábdikárimovanyń aıtýynsha, bıyl Astanaǵa josparlanǵandaı 400 emes, 500 bala kelgen eken. Bul festıvalge degen qyzyǵýshylyqtyń artyp otyrǵandyǵynyń aıqyn belgisi.
- Bizdiń festıvalde bári de jeńimpaz, munda kileń myqtylar jınalǵan. Árqaısysyna qatysýshy retinde emes, «Shattyq» festıvaliniń laýreaty retinde dıplom beriledi. Festıval aıasynda bes nomınatsııa boıynsha konkýrs ótkiziledi jáne Gran-prı ıegerleri anyqtalady. Atap aıtqanda, vokal, horeografııa, halyq áni jáne sán. Sharaǵa Qazaqstannyń barlyq oblysynyń ókilderi qatysady, biz qazaqstandyq jas talanttardyń ózindik bazasyn qurmaqpyz, sóıtip, naǵyz ónerli jastardy anyqtaımyz. Balalarǵa arnalǵan osyndaı qajetti baǵdarlamaǵa qoldaý kórsetkeni úshin Astana qalasynyń ákimdigine alǵys aıtamyn. Festıvaldi on jyl qatarynan uıymdastyryp kelemiz, al oǵan degen qyzyǵýshylyq artyp keledi. Munda balalardyń juldyzy janyp, olar jańa adamdarmen tanysady, qarym-qatynas quraıdy. Olarǵa arnap dostyq keshterin uıymdastyramyz, elordany kórsetemiz, olardyń kóbi munda birinshi ret keledi. Qazirdiń ózinde balalar bir-birine syılyqtar men kádesyılar tartý etýde, - deıdi Qarlyǵash Ábdikárimova.
Bıyl festıvalde Qazaqstannyń barlyq oblystarynan, sondaı-aq 13 memleketten kelgen qatysýshylar baǵyn synap jatyr, onyń ishinde Qyrǵyzstan, Ózbekstan, Tájikstan, Reseı, Belarýs, Ýkraına, Armenııa, Lıtva, Bolgarııa, Chehııa, Serbııa, Bosnııa jáne Gertsegovına, Túrkııa memleketterinen úmitkerler bar.
Qazylar alqasynyń músheleri de - túrli elderdiń ókilderi. Tóreshiler komandasynyń bas tóraıymy - KSRO halyq artısi, Sotsıalıstik eńbek eri, akademık Bıbigúl Tólegenova, ekinshi tóraǵasy - kompozıtor, QR eńbek sińirgen óner qaıratkeri Keńes Dúısekeev. Budan basqa, qazylar alqasynyń quramyna Bolgarııa, Lıtva, Belarýs, Túrkııa, Chehııa jáne Serbııanyń tanymal óner qaıratkerleri engen.
- Dástúrli «Shattyq» festıvali bıyl Astananyń 20 jyldyǵyna arnalady. Shara uıymdastyrylǵan 10 jyldyń ishinde qatysýshylar geografııasy edáýir keńeıdi. Bul qýantarlyq jaıt. Árbir óńirden, oblystan, qaladan birneshe nomerden usynylady. Delegatsııalar tutastaı kontserttik baǵdarlama ákeledi deýge bolady. Bul naǵyz balalar merekesi. Festıval alańynda basqa memleketterde Qazaqstannyń namysyn qorǵaıtyn, ony barsha álemge tanytatyn balalar óner kórsetedi, - dep atap ótti qazylar alqasynyń tóraǵasy Keńes Dúısekeev.
Chelıabilik delegatsııa bıyl sharaǵa besinshi ret qatysyp otyr. Balalar Astananyń sulýlyǵyna tánti bolypty
- Bıyl sharaǵa qatysýǵa 6-18 jastaǵy balalar keldi. Olar án aıtady, horeografııa kele almady Astanada buryn bolǵanbyz, bizge qatty unaıdy. Astana - ajarly qala, qonaqjaı, meıirimdi, pozıtıvti. Osyndaı keremet sharalar uıymdastyrylady, olarǵa úles qosatynymyzǵa qýanyshtymyz. Astanaǵa besinshi jyl qatarynan kelip júrmiz, qatysýshylar sany artyp keledi, olardyń kásipqoılyǵynyń deńgeıi de ósedi Birinshi ret kelgen kezge qaraǵanda qala keńeıipti, taza, ádemi ári zamanaýı, - deıdi chelıabilik halyqaralyq vokalıstter konkýrsynyń dırektory Igor Prýtskıh.
Festıvalge qatysýshylar búgin jáne erteń túske deıin qalalyq alańda óner kórsetedi Sodan keıin nomınatsııalar boıynsha Gran-prı ıegerleri anyqtalady jáne festıval qorytyndysy shyǵarylady.
