«Shatyrdaǵy ekeý» fılmi Reseıde arnaıy júldege ıe boldy
ASTANA. KAZINFORM – «Shatyrdaǵy ekeý» fılmi Reseıde ótken «V krýgý semı» halyqaralyq kınofestıvali aıasynda qazylar alqasynyń arnaıy júldesine ıe boldy.
Fılm QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Kartına ulttyq bolmysymen jáne mazmunymen erekshelenip, joǵary baǵalandy.
2025 jyly festıval rekordtyq kórsetkishke qol jetkizdi. Oǵan 121 elden 2500-den astam fılmge ótinim tústi. Olardyń qatarynda Qytaı, Túrkııa, Ońtústik Koreıa, Italııa, Úndistan, Iran, Meksıka, Soltústik Makedonııa elderiniń týyndylary bar. Sonymen qatar festıval tarıhynda alǵash ret Efıopııa men Senegaldan da fılmder qabyldanǵan. Baıqaý baǵdarlamasyna 36 elden kelgen tolyqmetrajdy jáne qysqametrajdy fılmder endi.
Festıvalde fılmniń túpnusqa mýzyka avtory, kompozıtor Vıktor Sologýb tanystyrdy. Kompozıtor marapatty búkil túsirilim tobynyń atynan qabyldap, tolqynysyn jetkizdi. Sonymen qatar hıkaıanyń erekshe qajettilikteri bar adamdardy tereńirek túsinýge jáne qabyldaýǵa septigin tıgizetinin atap ótti.
«Shatyrdaǵy ekeý» – rejısser Gúlshat Smaǵulovanyń tuńǵysh rejısserlik debıýti. Týyndy taǵdyry qıyndyqqa toly jas jigit Damır men aýtızm dertine shaldyqqan jasóspirim Kostıanyń arasyndaǵy dostyqty baıandaıdy.
Shyǵarmashylyq top kartınada ınklıýzııanyń mańyzyn jáne erekshe balalardyń qoǵamǵa beıimdelý máselesin kótergen. Túsirilim bıyl kóktemde Almaty qalasy men Almaty oblysy Talǵar aýdanynda ótti.
Mádenıet jáne aqparat mınıstrligi baspasóz qyzmeti málimetinshe, fılm qazaq jáne orys tilderinde ótken jyly prokatqa shyqty.
Eske sala keteıik, buǵan deıin «Grajdane kryshı» Hanty-Mansıısk qalasynda ótken XXIII halyqaralyq kıno-debıýttar festıvalinde «Dýsha Rossıı. Mırovoe kıno» nomınatsııasynda jeńiske jetken bolatyn. Sondaı-aq týyndy Úndistandaǵy «Zolotoı lev» halyqaralyq kınofestıvali aıasynda birden eki marapatqa ıe boldy. Olar – «Úzdik halyqaralyq tolyqmetrajdy fılm» jáne «Debıýttik fılm úshin úzdik rejıssýra» nomınatsııalary.
Budan bólek, fılm Máskeýde ótken Fashion Film Festival festıvalinde toǵyz júlde jeńip aldy.
«Shatyrdaǵy ekeý» fılmi halyqaralyq festıvaldiń toǵyz júldesin jeńip alǵanyn jazǵan edik.
Sonymen qatar fılm Úndistannyń Kalkýtta qalasynda ótken «Altyn arystan» (GLIFF) halyqaralyq kınofestıvalinde eki atalym boıynsha jeńimpaz atandy.