Shatyr ushyp, aǵash qulady: Aqtóbede daýyldan keıin qalpyna keltirý jumysy júrip jatyr
AQTÓBE. KAZINFORM - Qatty daýyl kezinde Aqtóbede 2 kópqabatty, 5 jer úıdiń shatyry ushty. Qazir birneshe turǵyn alap jaryqsyz otyr.
Aqtóbe oblystyq TJD baspasóz qyzmetiniń habarlaýynsha, búgin qalada soltústik-shyǵystan soqqan jel baǵyty ońtústik-batysqa aýysty. Arty qatty daýylǵa ulasyp, jeldiń ekpini 30m/s jetti. Sol kezde kommýnaldyq qyzmet brıgadalary kúsheıtilgen jumys rejımine kóshti.
- Daýyl saldarynan qulaǵan aǵashtardy jınaýǵa 10 merdiger uıymnyń jumys brıgadalary tartyldy. Olar Astana aýdany boıynsha 9 ýchaskede, Almaty aýdany boıynsha 7 ýchaskede jumys júrgizip jatyr. Al kópqabatty úılerdiń aýla aýmaqtarynda qulaǵan aǵashtardy shyǵarý jumysyn PIK, jáne múlik ıeleri birlestiginiń tóraǵalary uıymdastyrady. Sonymen qatar, qatty daýyl áserinen 2 kópqabatty úıdiń jáne 5 jeke turǵyn úıdiń shatyry búlingen,- dep habarlady Aqtóbe qalasy ákiminiń baspasóz qyzmeti.
Qalany jaryqpen qamtyp otyrǵan «Energosıstema» JShS-i de kúsheıtilgen jumys rejımine kóshti. Munda da jedel shtab quryldy.
- Qazirgi ýaqytta Aqtóbe qalasynyń 5 aýdanynda, Qýraıly, Prıgorodnyı turǵyn alaptarynda elektr energııasyn qalpyna keltirý jumystary júrgizilip jatyr. Elektrmen jabdyqtaý júıesiniń turaqty jumysyn qamtamasyz etý jáne týyndaǵan aqaýlardy jedel joıý maqsatynda kásiporynnyń qosymsha kúshi jumyldyryldy. Qazirgi tańda 10 avarııalyq brıgada men arnaıy tehnıka jumys atqaryp jatyr. Qajet bolǵan jaǵdaıda qosymsha brıgadalar men tehnıkalar tartylady,- dep habarlady baspasóz qyzmeti.
Buǵan deıin habarlaǵanymyzdaı, Aqtóbede nóser jaýynnan soń 100-den astam assenızator táýliktik kezekshilikke shyǵaryldy.
