«Qazposhta» men «Qazaqtelekom» shatyr basyp qalǵan áıelge aı saıyn ótemaqy tóleıdi
ASTANA. KAZINFORM — Jambyl oblysynda qatty jel ushyryp áketken shatyr basyp, I top múgedegi atanǵan áıel sot arqyly qosymsha ótemaqy óndirip aldy. Endi «Qazposhta» men «Qazaqtelekom» oǵan aı saıyn 177 myń teńgeden tóleýge mindetti. Bul týraly Jambyl oblystyq sotynyń baspasóz qyzmeti habarlady.
Oqıǵa 2023 jyldyń mamyrynda Jambyl aýdanynyń Asa aýylynda bolǵan. Qatty jel saldarynan «Qazposhta» jáne «Qazaqtelekom» AQ-ǵa tıesili ǵımarattyń shatyry ushyp, áıeldiń ústine qulaǵan. Ol aýyr jaraqat alyp, I top múgedegi atandy.
2024 jyldyń qazanynda Jambyl aýdandyq soty «Qazposhta» AQ-nan jábirlenýshiniń paıdasyna 8,5 mln teńgeden astam materıaldyq jáne 10 mln teńge moraldyq zııan óndirý týraly sheshim shyǵarǵan. Keıin oblystyq sot materıaldyq zalal somasyn 4,3 mln teńgege deıin azaıtqan.
Alaıda áıel emdelýge, dári-dármek pen medıtsınalyq buıymdar satyp alýǵa, qosymsha protsedýralardan ótýge jáne kóshýge baılanysty shyǵyndary áli de bar ekenin aıtyp, sotqa qaıta júgingen. Sondaı-aq jaraqatyna baılanysty jumys isteý múmkindiginen aıyrylǵanyn kórsetip, aı saıynǵy joǵalǵan tabysyn óndirýdi suraǵan.
— Sot áıeldiń oqıǵaǵa deıin áleýmettik qyzmetker bolyp jumys istegenin jáne aı saıyn 189-218 myń teńge aralyǵynda tabys tapqanyn anyqtady. Eńbek etý qabiletinen 90 paıyz aıyrylǵanyn eskere otyryp, aı saıynǵy ótemaqy mólsheri 177 myń teńge bolyp belgilendi. Bul qarajat áıel zeınetkerlik jasqa tolǵanǵa deıin tólenedi. Budan bólek, «Qazposhta» men «Qazaqtelekom» AQ-nan birlesip 1,4 mln teńgeden astam materıaldyq shyǵyn jáne memlekettik baj óndirildi, — delingen sot taratqan aqparatta.
Jaýapkerler sot sheshimine shaǵymdanǵanymen, Jambyl oblystyq sotynyń azamattyq ister jónindegi sot alqasy ony ózgerissiz qaldyrdy. Sot aktileri zańdy kúshine endi.
Osyǵan deıin jumys ornynda jaraqat alǵan aqtóbelik 10 mln teńge óndirip alǵanyn jazǵanbyz.
