Shatdaýndy toqtatý kerek - Tramp Úkimet jumysyn qaıta qalpyna keltirýge shaqyrdy

AQTÓBE. KAZINFORM – Prezıdent Donald Tramp Senattaǵy demokrattar engizgen obstrýktsııa erejeleriniń kúshin joıyp, 30 kúnnen beri qyzmeti toqtap turǵan Úkimettiń jumysyn qaıta qalpyna keltirýge shaqyrdy, dep habarlaıdy NBC News.

Obstrýktsııa nemese fılıbaster — zań jobalarynyń qaralýyna kedergi jasaý úshin parlament azshylyǵyn qoldanatyn tásil. Senat erejesi boıynsha zańdardyń kóbi qabyldanýy úshin onyń 100 múshesiniń kemi 60-y qoldap daýys berýi qajet.

Al respýblıkalyqtardyń Senatta da (53–47), Ókilder palatasynda da (219–213) sany ústem. 

— Demokrattar túbegeıli aqylynan aljasty. Bul jerde eń sońǵy amaldy qoldanbasa bolmaıdy. Tez arada fılıbasterdi toqtatý kerek! — dep jazdy Donald Tramp Truth Social áleýjelisinde.

Respýblıkalyqtar beısenbi kúni demokrattardy 21 qarashaǵa deıin úkimetti qarjylandyrýdyń ýaqytsha sharasyn qoldaýǵa shaqyrdy.

Al demokrattar bolsa, merzimi aıaqtalyp kele jatqan federaldy salyq jeńildikterin uzartý týraly kelissózder júrgizýdi talap etti. 

Eldiń Úkimeti 1 qazanda respýblıkalyqtar men demokrattar Kongersste memlekettik qyzmetshilerdi qarjylandyrý týraly zań jobasyna qatysty kelisimge kele almaǵandyqtan jumysyn toqtatty. AQSh-ta ol 2026 qarjy jylynyń alǵashqy kúni sanalady.

Aıta keteıik, AQSh-taǵy uzaqqa sozylǵan shatdaýn ekonomıka men jahandyq turaqtylyqqa qalaı áser etip jatqany mynaý siltemede saraptalǵan.