Shashýbaı aýylynda ambýlatorııa ǵımaraty jańartyldy - Qaraǵandy oblysy
QARAǴANDY. QazAqparat – Qaraǵandy oblysy Aqtoǵaı aýdanynyń Shashýbaı aýylynda ambýlatorııa ǵımaratynyń qasbeti kúrdeli jóndeýden ótti. Buǵan qosa, merdigerler medıtsınalyq mekemeniń mańyndaǵy aýmaqty abattandyrdy, dep habarlaıdy QazAqparat tilshisi.
Aqtoǵaı aýdanynyń Shashýbaı aýylynda otbasylyq-dárigerlik ambýlatorııanyń qasbeti men shatyrynyń kúrdeli jóndeýi aıaqtaldy. Jóndeý jumystaryna «Aýyl - el besigi» jobasy men «Jumyspen qamtýdyń jol kartasy» baǵdarlamasy aıasynda qarajat bólindi.
Jóndeý barysynda ǵımarattyń qasbeti qalpyna keltirilip, nyǵaıtyldy, shatyr jumystary da júrgizildi. Sonymen qatar, 16 kóshe shamdary qaıta qalpyna keltirilip, jańa qorshaý paıda boldy.
Otbasylyq-dárigerlik ambýlatorııany jóndeýge 15 adam jumyldyryldy. Olardyń beseýi aýdandyq jumyspen qamtý ortalyǵy arqyly tartyldy.
Endi ambýlatorııada ishki árleý jumystary bastalady.
