Shashtaraz qyzmeti: eldiń qaı óńirinde shash qııý baǵasy joǵary
ASTANA. KAZINFORM — Elimizde shash qııý qyzmetiniń aqysy bir-birinen alshaq. Oǵan ásemdik salonynyń mártebesi, kásibı sheberdiń deńgeıi men shashtyń uzyndyǵy, qalyńdyǵy áser etedi, dep habarlaıdy Kazinform tilshisi.
Eger shashty qysqartyp, bir túske boıatý qyzmetin alsaq eń joǵary baǵa Astana men Almaty qalalarynda tirkeldi. Astanadaǵy keıbir ásemdik salonynda shash qııý qyzmeti 18 000 teńgege deıin barady. Al shash boıaý qyzmetiniń quny 15 000 teńge jáne odan joǵary. Sonymen birge elimizdiń batysy men soltústiginde shash boıaý qymbatqa túsedi. Tańdaýly ásemdik salonynda baǵa 40 000 teńge jáne odan joǵary.
Degenmen Qazaqstannyń basym bóliginde qarapaıym qyzmet aqysy qoljetimdi bolyp tur. Pavlodar, Semeı, Qostanaı, Atyraý men Qyzylordada 2 000 — 2 500 teńgege shash qıdyrýǵa bolady.
Al bir túske boıaý qyzmeti Qyzylorda (5 000 teńgeden joǵary), Kókshetaý, Taldyqorǵan men Semeıde qoljetimdi. Baǵa Taraz, Petropavl, Aqtaý, Óskemen jáne Túrkistan qalalarynda ortasha. Bul óńirlerde shash qııý qyzmeti 4 000-10 000 teńge, al boıaý 8 000-20 000 teńge aralyǵynda.
Aıta keteıik, bul qarapaıym ǵana shash qııý men bir túske boıaý qyzmeti. Al qazir shash boıaýdyń birneshe ádisi bar jáne árqaısysynyń tehnıkasy ártúrli, baǵasy ózgeshe. Máselen AirTouch, balaıaj, shatýsh, melırleý jáne shashty aǵartý quny sheberge jáne shash úlgisi men qalyńdyǵyna qaraı ózgeredi.
Shashtyń túsin ózgertýge qajetti qospalardyń quny men jumys ýaqyty baǵaǵa áser etedi. Sebebi bir adamǵa 3-6 saǵat ýaqyt kerek. Bul qyzmettiń quny 25 000 — 80 000 teńge aralyǵynda.
Shashty qııý, boıaýmen qatar qazirgi ásemdik salondary onyń kútimine, qalpyna keltirip, tabıǵı qalpyn saqtaýǵa kóp kóńil bóledi. Munda da baǵa qyzmet túrine qaraı ózgerip otyrady. Qazir shashty keratın arqyly jatqyzyp, botoks arqyly jyltyr qalypqa túsiredi. Sonymen birge nanoplastıka jasatady.
Botoks saldyrý, shashty nárlendirip, emdeý baǵasy 12 000 teńgeden bastalyp, 30 000 teńgege deıin jetedi. Keratin jasatqan kezde shash sýsyldap, tógilip turady. Qyzmet quny –15 000 — 45 000 teńge aralyǵynda jáne odan joǵary. Baǵa shash uzyndyǵyna qaraı ózgeredi.
Qazaqstandaǵy sán ındýstrııasy qaltaǵa qaraı qyzmet kórsete alady. Qarapaıym qyzmet túrlerinen bastap, zamanaýı ádis-tásilderdi paıdalanady. Alǵashqysyna qaraǵanda keıingisiniń aqysy birneshe ese joǵary.
Eske salsaq, buǵan deıin elimizdegi fotosessııa baǵasy týraly jazyldy.
