Sharyndaǵy jaǵdaıǵa muǵalimder men mekteptiń eshqandaı qatysy joq - ata-analar
ALMATY. QazAqparat – Almatydaǵy №199 gımnazııa oqýshylarynyń ata-analary Sharyn shatqalyndaǵy apatqa muǵalimder men mekteptiń eshqandaı qatysy joq ekenin aıtty, dep habarlaıdy QazAqparat tilshisi.
Búgin atalǵan mektep ǵımaratynda qalalyq polıtsııa búkil ata-analardan jaýap ala bastady. Arasynda balasy ekskýrsııaǵa barmaǵandar da bar. Olar Sharynǵa saıahat týraly aıtyp berdi.
«Bizdi jaýap alýǵa shaqyrdy. Biraq bizden ne úshin jaýap alyp jatyr, sony túsine almaı turmyn. Meniń balam Sharyn shatqalyna barǵan joq», - dep tańǵalady ata-analardyń biri.
Jınalǵan ata-analar mektep pen muǵalimderge eshqandaı shaǵymy joq ekenin aıtty.
«Mekteptiń buǵan esh qatysy joq. Bul ekskýrsııany ata-analardyń ózderi uıymdastyrdy. Biz balalarymyz sabaqtan keıin azdap demalsyn degen edik. Óıtkeni olar onlaın oqyp, kópten beri kórispegen bolatyn. Biraq men balamdy jibermedim, sebebi ol jaqqa týystarymyzben birge barǵan edik», - deıdi mektep oqýshysynyń anasy Aınur Táshimova.
Onyń aıtýynsha, Sharyn shatqalyna ekskýrsııa uıymdastyrý ıdeıasy ata-analardan shyqty.
«Sharyn shatqalyna 5-synyp oqýshylary bardy. Munda muǵalimderdiń esh qatysy joq, kerisinshe, ózderi balalardy qutqaram dep aýrýhanaǵa tústi. Ata-analar muǵalimderge Sharynǵa birge barýdy usyndy, olar kelisimin berdi. Bizdiń olarǵa eshqandaı shaǵymymyz joq, biz ózimiz uıymdastyryp, muǵalimderdi shaqyrdyq», - deıdi ol.
Besinshi synyp oqýshylarynyń ata-analary 25 mamyrda demalys kezinde balalardyń qaýipsizdigine ózderi jaýapty ekenin aıtyp, qolhat bergen.
«Biz muǵalimderdi jaýapqa tarta ma dep qorqamyz. Mektep zardap shekpeýi kerek. Olardyń ústinen qylmystyq is qozǵalmasa eken. Muǵalimder balalarymyzǵa óz balasyndaı qaraıdy. Bul oqıǵa olardyń bizdiń balalarymyzǵa beıjaı qaramaıtynyn taǵy bir dáleldedi. Balalar óz muǵalimderin qatty qurmetteıdi. Sondyqtan keıbir ata-analar balalaryn esh qıyndyqsyz muǵalimderge senip jiberdi», - deıdi ata-ana.
Eske salaıyq, 29 mamyr kúni Almatynyń №199 mektebiniń 5-synybynda oqıtyn 8 oqýshy, 5 ata-ana jáne 3 muǵalim Sharyn shatqalyna saıahatqa shyqqan.
Shatqalda kenet sel júrip, 2 adam mert boldy, bir adam iz-túzsiz joǵalyp, taǵy altaýy zardap shekti.
Keıinnen QR Bilim jáne ǵylym mınıstrligi atalǵan oqıǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumysy júrip jatqanyn málim etti.
Mert bolǵan ustaz - 26 jastaǵy Mereı Ibragımov kórkemóner pánderinen sabaq bergen. Eńbek ótili – 5 jyl.
30 mamyrda selge aǵyp ketken oqýshy qyz tabyldy. Ony qutqarý sátinen vıdeo jarııalandy.
Sharyn shatqalynda joǵalǵan 11 jastaǵy qyz bala oqıǵanyń qalaı bolǵanyn aıtyp berdi.
Keıinnen Almaty qalalyq bilim basqarmasy Sharyn shatqalyna ekskýrsııa mektep ákimshiligimen kelisilmegenin jetkizdi.
