Sharyn ulttyq parkinde avtomatpen qaraquıryq atqan brakoner ustaldy
Bul týraly QR AShM Orman sharýashylyq jáne janýarlar álemi komıtetiniń baspasóz hatshysy Sáken Dildahmet jazdy.
«2019 jyldyń 3 maýsymynda saǵat 18.00-de Sharyn memlekettik tabıǵı parki aýmaǵynda memlekettik ınspektorlar mototsıkl mingen kúdiktini baıqaǵan. Ulttyq parktiń jedel toby ony toqtatqysy kelgenmen mototsıkli zańdy talaptarǵa baǵynbaǵan. Sondyqtan, Uıǵyr aýdandyq polıtsııa qyzmetkerleri shaqyryldy. Polıtsııa men ulttyq park qyzmetkerleriniń birlesýimen Almaty oblysy Uıǵyr aýdany Sharyn aýylynyń 1989 jyly týǵan turǵyny ustaldy. Onyń «Honda» markaly mototsıklinde memlekettik tirkeý nómiri bolmaǵan», - dep jazdy S. Dildahmet áleýmettik jelide.
Kúdikti ustalǵan mańnan 12 oǵy bar «AK-103» markaly avtomat qarýy men qaraquıryqtyń eti tabyldy.
«Tergeý barysynda kúdikti Sharyn ulttyq parkiniń Temirlik aýmaǵynan qara paketke oralǵan 20 oǵy bar «AK-103» markaly avtomat qarýyn taýyp alǵanyn aıtty. Osy arqyly jabaıy ańdardy aýlaǵysy kelgen. Bul fakt Uıǵyr aýdandyq polıtsııa bólimine tirkeldi. QR Qylmystyq Kodeksiniń 287-baby, 3-bóligi jáne 337-baby, 4-bóligi, 1,2 tarmaqtary boıynsha qylmystyq is qozǵaldy. Aldyn ala esep boıynsha, zańsyz ańshylyqtan kelgen shyǵyn 7 575 000 teńge bolǵan», - dep jazdy komıtet ókili.