Sharyn shatqalyndaǵy sel: 11 jastaǵy qyz onshaqty kún em qabyldaıdy
ALMATY. QazAqparat - Dárigerler Sharyn shatqalynda bolǵan apattan aman qalǵan 11 jastaǵy qyzdyń jaǵdaıy týraly aıtty, dep habarlaıdy QazAqparat tilshisi.
Balalar shuǵyl medıtsınalyq járdem ortalyǵynyń bas dárigeriniń orynbasary Alýa Jeksenovanyń aıtýynsha, aýrýhanaǵa ákelingen 11 jastaǵy oqýshynyń jaǵdaıy ortasha aýyr bolǵan.
«Balanyń kelgen kezdegi jaǵdaıy ortasha aýyr boldy. Qabyldaý bóliminde mamandandyrylǵan kómek kórsetilip, Neırohırýrgııa bólimshesine jatqyzyldy. Oǵan mıdyń jabyq jaraqaty, mıdyń shaıqalýy, ortasha aýyrlyqtaǵy gıpotermııa, qoly jáne aıaǵynyń kóp jeri soǵylǵan degen dıagnoz qoıyldy. Qazir jaǵdaıy turaqty», - dedi Balalar shuǵyl medıtsınalyq járdem ortalyǵynyń bas dárigeriniń orynbasary Alýa Jeksenova.
Onyń aıtýynsha patsıent 7-10 kúnniń aralyǵynda em qabyldaıdy.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolyp, 1 adam iz-túzsiz joǵalǵany, taǵy 6 adam zardap shekkeni habarlanǵan bolatyn.
Keıin Bilim jáne ǵylym mınıstrligi atalǵan oqıǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumystary júrgizilip jatqanyn málim etken edi.
«Sharyn shatqaly» qyzmetkerleri Sharyn ózeniniń boıyn jaǵalaı jer betinde izdeý-qutqarý jumystaryn júrgizý barysynda 30 mamyr tańǵy saǵat 09:34-te 2010 jyly dúnıege kelgen qyz balany tapqan bolatyn.
Ol Sharyn ózeniniń sol jaǵalaýynda oqıǵa ornynan 3-4 shaqyrym jerden tabylǵan.
Sharyn shatqalynda selge aqqan qyz bala qutqarylǵan sát beınelengen vıdeo jarııalandy.
Sharyn shatqalynda joǵalǵan 11 jastaǵy qyz bala oqıǵanyń qalaı bolǵanyn aıtyp berdi.
Almaty qalalyq bilim basqarmasy Sharyn shatqalyna ekskýrsııa mektep ákimshiligimen kelisilmegenin jetkizdi.
