Sharyn shatqalynda selden zardap shekken eki adam aýrýhanadan shyǵaryldy
ALMATY. QazAqparat - Sharyn shatqalynda selden zardap shekken eki adam aýrýhanadan shyǵaryldy. Bul týraly Almaty qalalyq qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.
Densaýlyq saqtaý basqarmasynyń málimetinshe, Sharyndaǵy selden jaraqat alǵan eki adam Almatydaǵy №4 qalalyq klınıkalyq aýrýhanaǵa jetkizilgen.
«Men sol ekskýrsııada gıd boldym. Sharyn shatqalyndaǵy sel kóshkini kezinde 4 oqýshymen birge selde qalyp, jaraqat aldym. Alǵashqyda jaraqat sezinbedi, maǵan balalardy avtobýsqa jınaý, qalǵandaryn tabýǵa kómektesý jáne ata-analarmen kezdesý qajet boldy. Ata-analar balalardy taratyp alyp ketkennen keıin, artymnan ápkem kelgende, men aıaǵymnyń aýyrsynýyn jáne qatty bas aınalýyn sezindim. Bir sátte esimnen tanyp qaldym. Aýrýhanada ózime keldim», - dedi Mádına.
№4 qalalyq klınıkalyq aýrýhananyń bas dárigeri Saǵı Beısenbekovtiń aıtýynsha, naýqas keshendi tekserýden ótip, em qabyldady.
«Naýqas birden reanımatsııa bólimine jetkizilip, keshendi tekserýden ótti. Ony quramynda travmatolog, terapevt, anestezıolog bar dárigerlerdiń mýltıdıstsıplınarlyq brıgadasy qarady. Beıindi bólimshede tolyq em-sharalardy alyp shyqty», - deıdi №4 qalalyq klınıkalyq aýrýhananyń bas dárigeri Saǵı Beısenbekov.
Sonymen qatar, atalǵan aýrýhanada №199 mektep-gımnazııasy muǵalimi em qabyldady. Tótenshe oqıǵa kezinde muǵalim jabyq bas súıek-mı jaraqatyn, mı shaıqalý, deneniń, aıaq-qoldyń kóptegen jaraqatyn aldy.
Oqıǵa bolǵan kúni jedel járdem kóligimen Uıǵyr ortalyq aýdandyq aýrýhanasyna jetkizildi, al 30 mamyrda №4 qalalyq klınıkalyq aýrýhanasynyń qabyldaý bólimine óz betinshe júgindi.
«30 mamyrda naýqas beıindi bólimshege jatqyzylyp, medıtsınalyq kómektiń tolyq kólemin aldy. Sharyn shatqalynda zardap shekkendermen birge psıhologtar jumys istedi, búginde olar turǵylyqty jeri boıynsha odan ári ambýlatorııalyq emdelýge jaqsartylyp shyǵaryldy», - dep túıindedi bas dáriger.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolyp, 1 adam iz-túzsiz joǵalǵany, taǵy 6 adam zardap shekkeni habarlanǵan bolatyn.
