Sharyn shatqalynda ekotýrızmdi damytýǵa ınvestorlar tartylmaq
ALMATY. QazAqparat – «Sharyn» ulttyq parkinde ekotýrızmdi damytý boıynsha qurylǵan Qoǵamdyq keńestiń birinshi otyrysy ótti, dep habarlaıdy QazAqparat tilshisi.
Keńes quramynda ǵalymdar, salanyń sarapshylary, týrıstik qaýymdastyq ókilderi, qoǵam belsendileri men eko-aktıvıster bar.
«Sharyn» memlekettik ulttyq tabıǵı parkin damytý tujyrymdamasy 21 tamyz kúni tanystyrylǵan bolatyn. Qoǵamdyq keńes atalǵan jobanyń júzege asýyn baqylaıtyn bolady.
Jobada negizinen týrıstik marshrýttar men soqpaq joldardy damytýǵa kúsh salynady. Zamanaýı vızıt-ortalyqtar, gempıng, kempıngter, etnoaýyldar salynady. Karavanıngke arnalǵan oryn bolady. Park aýmaǵynda kúrdeli qurylys júrmeıdi, nysandar jeńil jınalatyn konstrýktsııalar arqyly turǵyzylady. Osylaısha qorshaǵan ortaǵa túsetin júktemeni azaıtyp, sapaly qyzmet usynatyn biregeı týrıstik ónim jasaýǵa múmkindik týady.
Aýmaqta ekotýrızmdi jeke ınvestorlardy tartý arqyly damytý josparlanyp otyr:
– Eki zamanaýı vızıt-ortalyq salynady.
– 4 jaıaý júrginshi marshrýty bolady.
– Túneıtin oryndar daıyndalady.
– Etnoaýyl salynady.
– 3 kórý alańy qoıylady.
Glempıng, kempıng, karavanıng pýnktteri, qoǵamdyq tamaqtaný oryndary, kádesyı dúkenderi ornalastyrylady. Qorshaǵan ortaǵa túsetin rekreatsııalyq júktemeni azaıtý úshin qyzmet kórsetý nysandarynyń bári shatqaldyń syrtynda salynbaq.
Joba Qoǵamdyq keńes múshelerimen talqylanyp, qabyldanǵannan keıin ǵana ınvestorlar ashyq baıqaý negizinde tartylady. Aldynda Ekologııa mınıstrliginde aıtylǵandaı, ulttyq park jerleri zań boıynsha eshqandaı jaǵdaıda jeke menshikke berilmeıdi. Tek belgili bir aýmaqtar ǵana týrızmdi damytý maqsatynda ýaqytsha paıdalanýǵa berilýi múmkin. Alaıda ınvestor óz mindetterin oryndamaǵan jaǵdaıda memleket kez kelgen ýaqytta kelisim shartty úze alady.
