Sharyn ózeninen qańqaǵa aınalǵan adamnyń múrdesi tabyldy
TALDYQORǴAN. QazAqparat - Almaty oblysynyń polıtseıleri asa aýyr qylmystyń betin ashty, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 4 sáýir kúni Uıǵyr aýdanynyń jergilikti turǵyny Sharyn ózeninen jartylaı qańqaǵa aınalǵan adamnyń múrdesin tapqan. Taǵaıyndalǵan saraptama er azamattyń birneshe pyshaq jaraqatynan qaza tapqanyn kórsetti. Osyǵan sáıkes qylmystyq is qozǵalyp, tergeý júrgizildi.
«Tergeýge aýdandyq tártip saqshylarymen qatar oblystyń polıtseıleri de qatysty. Bir aıdyń ishinde jábirlenýshi Almaty qalasynyń 48 jastaǵy turǵyny ekeni anyqtaldy. Ary qaraı tergeý barysynda kúdikke marqumnyń jaqyn týysy ilindi. Týysyn óltirdi degen kúdikti keshe ustalyp, ýaqytsha ustaý ızolıatoryna qamaldy», - dep málim etti atalǵan vedomstvo ókilderi.
Anyqtalǵandaı, adam óltirý qylmysy 2018 jyldyń 15 jeltoqsanynda Almaty qalasynda bolǵan. Qylmysty jasyrý úshin múrde kólikpen 150 shaqyrym jerdegi Uıǵyr aýdanyna jetkizilip, Sharyn ózenine batyrylǵan.
«Qazir sotaldy tergeý jalǵasýda. Іs Almaty qalasynyń polıtseılerine berilýi múmkin. Sebebi oqıǵa Almaty qalasynda bolǵan», - dep tolyqtyrdy oblystyq departamentten.
