Sharýashylyqtar úshin dızel otynynyń baǵasy qymbattady ma

NUR-SULTAN. QazAqparat – Sharýashylyqtar úshin dızel otynynyń ortasha baǵasy lıtrine 165 teńgeni qurady. Bul týraly QR Aýyl sharýashylyǵy birinshi vıtse-mınıstri Aıdarbek Saparov málim etti, dep habarlaıdy QazAqparat tilshisi.

«Sharýalar tuqymdyq materıalmen tolyq qamtylǵan. Tekserilgen tuqymdardyń 90 paıyzy birinshi, ekinshi egistik standartyna saı keledi. Ónimdilikti arttyrýdyń mańyzdy faktory tyńaıtqyshtardy jetkilikti mólsherde qoldaný bolyp otyr. 500 myń tonnaǵa jýyq mıneraldy tyńaıtqyshtarǵa kelisimshart jasaldy. Búgingi tańda sharýalarǵa 400 myńǵa jýyq tonna jetkizildi, bul ótken jylmen salystyrǵanda 40 myń tonnaǵa artyq. Sharýalar ósimdikterdi qorǵaý quraldarymen qamtamasyz etilýde», - dedi birinshi vıtse-mınıstri Ortalyq kommýnıkatsııalar qyzmetinde.

Sonymen qatar ol naryqta munaı ónimderiniń baǵasy kóterilgenin eske saldy.

«Baǵanyń ósýine qaramastan, Úkimet egis jumystarynyń dızel otynyna qajettiligin 100 paıyz qamtamasyz etý úshin barlyq sharalardy qabyldady. Sharýashylyqtar úshin dızel otynynyń ortasha baǵasy lıtrine 165 teńgeni qurady, bul naryqtan 14 paıyzǵa arzan», - dedi A. Saparov.

Budan buryn habarlanǵandaı, oblys ákimdikteriniń derekteri boıynsha bıyldyń egis naýqanyn 3 maýsymǵa deıin aıaqtaý josparlanyp otyr.