Sharýalarǵa jeńildikpen beriletin kredıt kólemi 1,2 trln teńgege jetti

ASTANA. KAZINFORM – Ósimdik sharýashylyǵynda qol jetkizilgen nátıjelerge memlekettik qoldaýdyń áseri zor. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

a
Foto: AShM

- Otandyq óndirýshilerdi qoldaý jáne sharýashylyqtardy tehnologııalyq jańǵyrtý nátıjesinde bıylǵy on aıda ósý qarqyny qalyptasty. Aýyl sharýashylyǵy jalpy óniminiń kólemi 8,9 trln teńgeni qurap, 5,2% ósti. Ósimdik sharýashylyǵyndaǵy ósim 6,4%, mal sharýashylyǵynda 3,2% boldy. Azyq-túlik óndirisi 13% ósip, 3,6 trln teńgege jetti. Búginde elimizde shamamen 270 myń aýyl sharýashylyǵy ónimin óndirýshi jumys isteıdi. Olardyń 25 myńǵa jýyǵy memleketten sýbsıdııa alady. Sýbsıdııa alýshylardyń 90%-y shaǵyn jáne orta sharýashylyqtar. Sýbsıdııalaý – bul shyǵyndardyń bir bóligin óteý ekenin atap ótken jón. Sharýashylyqtar aldymen tuqym men tehnıka satyp alady, qajetti mıneraldyq tyńaıtqyshtardy engizip, ósimdikterdi qorǵaý quraldaryn qoldanady. Sodan keıin olardyń naqty jumsaǵan shyǵyndarynyń bir bóligi óteledi, - dedi ol.

Mınıstrdiń aıtýynsha, sýbsıdııa berý júıesi jetildirilip jatyr. Qazir sharýalar ótinimderdiń qaı kezeńde turǵanyn kóre alady. Barlyq derek avtomatty túrde tekseriledi. Bul memlekettik qoldaýdyń ashyq ári ádil berilýine múmkindik beredi.

- Sharýalarǵa jeńildikpen beriletin kredıt kólemi de edáýir artyp keledi. 2025 jyly bıýdjetten 153 mlrd teńge bólinip, sonyń esebinen aýyl sharýashylyǵyna 1 trln teńge jeńildetilgen kredıt berildi. Al bıyl bul kórsetkish kólemi alǵash ret 1,2 trln teńgege jetti. Bul sharýashylyqtarǵa qajetti resýrstardy ýaqytyly satyp alyp, dala jumystaryn ońtaıly agrotehnıkalyq merzimde júrgizýge múmkindik beredi, - dedi Aıdarbek Saparov.

Onyń málimetinshe, kredıt qoljetimdiligin keńeıtý úshin qarjylandyrýdyń alty kanaly iske qosylǵan. Sonymen qatar kepili jetkiliksiz sharýashylyqtar úshin qaryzdarǵa kepildik berý tetigi qoldanylady.

- 2027 jylǵy egis jumystaryn qarjylandyrýdy da erte bastalady. Ótinimder qabyldaý bıylǵy 1 qazanda bastaldy. Qaıta óńdeý kólemin ulǵaıtý maqsatynda óńdeý kásiporyndardyń aınalym qarajatyna jeńildikpen kredıt berý jalǵasyp jatyr. Bıyl osy baǵytta 120,8 mlrd teńgege 227 ótinim qarjylandyryldy, - dedi mınıstr.

Aıdarbek Saparovtyń aıtýyna qaraǵanda, ósimdik sharýashylyǵynda qol jetkizilgen nátıjelerge memlekettik qoldaýdyń da áseri zor. Aýyl sharýashylyǵynda tyńaıtqysh engizý kólemi de josparly túrde ulǵaıyp keledi. 2026 jyldyń 10 aıynda sharýalar 2,1 mln tonna tyńaıtqysh engizdi. Bul ótken jylǵy kórsetkishten 400 myń tonna kóp.

- Tyńaıtqyshqa suranystyń artýy otandyq óndiristiń damýyna jáne tyńaıtqysh shyǵarý kóleminiń ulǵaıýyna yqpal etip otyr. 2026 jyldyń 10 aıynda 936 myń tonna tyńaıtqysh óndirildi. Bul ótken jyldyń kórsetkishinen 4% kóp, - dedi ol.

Aıta keteıik, Úkimet otyrysynda otandyq taýar óndirýshilerdi qoldaý máselesi qaralyp jatyr.