Sharýalarǵa jeńildetilgen dızel otyny kestege saı jetkizilmeı jatyr

PETROPAVL. KAZINFORM – QR Aýyl sharýashylyǵy mınıstri Aıdarbek Saparov Soltústik Qazaqstan oblysynda egin ekken dıqandarmen kezdesip, sharýalardyń túıtkildi máselelerin tyńdady. Kóktemgi naýqannyń qarqyny men sapasyn kórdi.

Bul jaıynda mınıstr áleýmettik jelidegi paraqshasynda jazdy. 

«Oblystyń burynǵy basshysy retinde men aımaqtyń aýyl sharýashylyǵy salasynyń jaǵdaıyn jaqsy bilemin.

Oblys boıynsha 4,3 mln ga egis alqabynyń búgingi kúnge deıin 38,7%-na egin egildi. Aýa raıynyń qolaısyzdyǵyna qaramastan, fermerler táýlik boıy eńbek etip keledi. Sebebi, jaqsy ónim alýdyń negizgi faktorlarynyń biri – ýaqytyly egin egý», - dedi Aıdarbek Saparov. 

SQO-da mınıstr aýdandardy aralap, dıqandarmen kezdesti. Kezdesýde sharýalar jeńildetilgen dızel otynyn alýdyń ózgertilgen erejelerine qatysty suraqtar qoıǵan. 

«15 mamyrdan bastap jańa erejeler qoldanylady. Atap ótsem: kóktemgi egis jáne egin jınaý jumystaryna jeke ótinim berýdiń ornyna, rásimdi jeńildetetin endi biryńǵaı ótinish qoldanylady.

Ótinish berý merzimi 20 kúnnen 30 kúnge deıin uzartyldy.

Otyn shyǵynynyń biryńǵaı bazalyq normalary alynyp tastaldy. Endi normatıvter aımaqtardyń topyraq-klımattyq jaǵdaılaryn eskere otyryp belgilenetin bolady.

Qalǵan sýbsıdııalanatyn dızel otynyn paıdalanýǵa bolatyn aýyl sharýashylyǵy jumystarynyń qosymsha túrlerine normatıvter engizildi. 

Bul ózgeristerdiń barlyǵy fermerlermen birlesip, olardyń usynystary negizinde ázirlendi», - dep jazdy Aıdarbek Saparov. 

Mınıstrdiń aıtýynsha, birqatar óńirde janarmaıǵa suranys joǵary, al jeńildetilgen dızeldik otyn jetkizilip úlgermeı jatyr. 

«236,4 myń tonna nemese 63% ǵana sharýashylyq ıelerine jóneltildi. Osyǵan baılanysty oblys ákimdikteri janar-jaǵarmaıdy kestege sáıkes tezirek jetkizýdi qamtamasyz etýi qajet.

Sondaı-aq bıyl jeńildetilgen nesıeleý kólemi 3,2 esege ósip otyr. ıAǵnı, nesıeni 5% mólsherlememen 12 aıǵa alýǵa bolady. Demek, fermer kúzde arzan ári tıimsiz baǵamen ónimdi satyp, kredıt jabýǵa jantalaspaıdy. 

Sondaı-aq kezdesýlerde sharýalardyń da mindettemeleri talqylandy. Biz tehnologııany saqtaý, sapaly tuqym men tyńaıtqyshtardy paıdalaný arqyly ónimdilikti arttyrýǵa umtylýymyz kerek», - dedi Aıdarbek Saparov. 

Buǵan deıin Ózbekstanda munaı ónimderi, gaz, kómir, elektr energııasy ımporty kúrt óskenin aıtqan edik.