Sharýalarǵa jeńildetilgen nesıe berý talaptary qandaı
ASTANA. QazAqparat - Úkimet úıinde «Aýyl sharýashylyǵyn qarjylaı qoldaý qory» AQ basqarma tóraǵasy Jandar Omarov aýyldaǵy kásipkerlikti damytý men sharýalarǵa jeńildetilgen nesıe berý talaptaryn túsindirdi, dep habarlaıdy QazAqparat.
Basqarma basshysynyń aıtýynsha, memleket jeńildetilgen nesıe berýdi 2017-2021 jyldarǵa arnalǵan Nátıjeli jumyspen qamtý jáne Jappaı kásipkerlikti damytý baǵdarlamasy arqyly júzege asyrady.
«Memleket basshysy halyqty áleýmettik jańǵyrtýǵa baǵyttalǵan 5 bastama ishinde shaǵyn nesıeleýdi kóbeıtý týraly máseleni kóterdi. Bıyl shaǵyn nesıeleýdiń kólemi 20 mlrd teńgege ulǵaıyp, jylyna 62 mlrd teńgege deıin ósedi. Sondaı-aq, óz bıznesin bastaýǵa jáne keńeıtýge múmkindik alǵan qazaqstandyqtardyń sany 14 myńǵa jetedi dep kútilýde», - dep atap ótti Jandar Omarov Úkimet úıinde «Prezıdenttiń bes áleýmettik bastamasyn júzege asyrý aıasynda aýyldaǵy kásipkerlikti damytýǵa» atty taqyrypta ótken baspasóz máslıhatynda.
Shaǵyn nesıeleýdiń negizgi qaǵıdalary men mehanızmderi, sharttary baǵdarlamanyń ózinde jáne nesıeleý erejelerinde qarastyrylǵan. ıAǵnı jeńildetilgen nesıeler jylyna 6% 5 jylǵa deıin, mal sharýashylyǵy salasyndaǵy nesıeler - 7 jylǵa deıingi merzimge beriledi.
Beriletin nesıe mólsheri 8 myń aılyq eseptik kórsetkishke deıin - 19 mıllıon 240 myń teńgeni quraıdy.
«Baǵdarlama aıasynda bizdiń qor 19,3 mlrd teńgege 5 694 jobany qarjylandyrdy. Onyń ishinde 11,5 mlrd teńge bólingen 3 426 joba - startaptar edi. ıAǵnı, qarjylandyrýdyń 60 protsenti startap-jobalarǵa bólinip otyr», - dep óz sózin tolyqtyrdy J. Omarov.
Sondaı-aq, J. Omarov ózge qarjylyq ınstıtýttarmen salystyrǵanda Aýyl sharýashylyǵyn qarjylaı qoldaý qorynyń kepildik saıasatynyń da sharýalarǵa qolaıly ekenin atap ótti.
«Máselen, ekinshi deńgeıli bankter nesıe bererde qala syrtyndaǵy jer telimin, aýyl sharýashylyǵyna arnalǵan jerlerdi kepil esebinde qabyldamaıdy. Al bizde esh shekteý joq. Jyljıtyn jáne jyljymaıtyn múlikter, salynǵan jyly men materıalyna qaramastan, úıler men ǵımarattar kepil retinde qabyldanady», - deıdi Jandar Omarov.
