Sharýalarǵa tıimdi avtomattandyrylǵan jańa júıe engizildi
Memleket basshysy Qasym-Jomart Toqaev bıyl 1-qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty halyqqa Joldaýynda «Tıimdi shaǵyn jáne orta bıznes – qala men aýyldy damytýdyń berik negizi. Shaǵyn, ásirese, mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqarady», - dep atap ótken bolatyn.
Shaǵyn kásipkerlikpen aınalysatyn aýyldyqtardy memleket tarapynan qoldaýdyń orny bólek. Ásirese, kásip bastaımyn degen azamattardyń shaǵyn nesıege jyldam qol jetkizýin qamtamasyz etý óte mańyzdy.
«QazAgro» Holdınginiń enshiles kompanııasy – Aýyl sharýashylyǵyn qarjylaı qoldaý qory onlaın-nesıeleý jumysyn bastady. «Eńbek» baǵdarlamasy aıasynda mal sharýashylyǵyn damytýǵa (4 mln teńgege deıin) nesıe alǵysy keletin kásipkerler úıinen nemese keńseden nesıege onlaın ótinim bere alady.
Aıta ketý kerek, kásipker bergen ótiniminiń maquldanǵanyn nemese maquldanbaǵanyn aldyn-ala bile alady. Buryn 10-13 qujat jınaý talap etilgen bolsa, qazir tek ótinim berýshiniń jeke kýáligi, elektrondy tsıfrlyq qoltańbasy jáne kepildikke qoıatyn múliginiń qujaty ǵana qajet. Búgingi tańda jańa júıe arqyly 65 sharýanyń ótinimi maquldanyp úlgerdi.
Almaty oblysynyń Jambyl aýdanyna qarasty Qaınazar aýylynda turatyn Anapııa Aımuhan nesıege onlaın-ótinim bergen alǵshqy sharýalardyń biri. Qoı sharýashylyǵyn damytýǵa úshinshi ret nesıe alǵaly otyrǵan fermer avtomattandyrý júıesiniń artyqshylyǵy jóninde aıtyp berdi.
«Aýyl sharýashylyǵyn qarjylaı qoldaý qorynan osyǵan deıin eki ret nesıe alyp, qoı sharýashylyǵyn bastaǵan edim. Úshinshi ret taǵy nesıe alǵaly otyrmyn. Buryn nesıe alýǵa 10-13 qujat jınaıtyn edik. Qalaǵa jıi baratynbyz, Halyqqa qyzmet kórsetý ortalyǵynyń kezegine turyp qansha ýaqyt ketiretinbiz. Jalpy qujat jınaýǵa eki aptadan bir aıǵa deıin ýaqytymyz ketetin. Jol shyǵynymyz taǵy bar. Qazir Elektrondy tsıfrly qoltańbam, jeke kýáligim jáne kepildikke qoıatyn múligimniń qujaty ǵana kerek. Úıde otyryp-aq, aldyn ala ótinim berýge múmkindik jasaǵan eken. Qýanyp otyrmyn. Jańa ǵana 4 mln teńge nesıe alý úshin onlaın ótinim bergen edim, mine ótinimińiz maquldandy degen habarlama keldi. Ary qaraı nesıe alýyma eshteńe bóget bolmaıdy. Sharýalar úshin osyndaı múmkindik jasaýǵa yqpal etken Prezıdentimizge, mamandarǵa kóp rahmet!» - deıdi Anapııa Aımuhan.
Aımuhannyń qorasynda qazir 150 bas saýlyq qoı men 60-qa jýyq toqtysy bar. Endi 4 mln teńge nesıege taǵy qoı men jem-shóp satyp almaq. 36 jastaǵy sharýanyń 3 balasy bar. Uldaryn da osy sharýashylyqqa baýlyǵysy keledi. Óıtkeni, mal ósirý atakásibimiz jáne tabysty kóbeıtip, turmysty jaqsartýǵa bolady, deıdi ol. Qorasy men jaıylymyn keńeıtý úshin jergilikti ákimdikke ótinish te jazyp qoıypty. Aýyly alyp shahardyń irgesinde bolǵandyqtan, qoıdyń etin satýdan qıyndyq týyndamaıtynyna bek senimdi.
Aýyl sharýashylyǵyn qarjylaı qoldaý qorynyń Almaty fılıalyndaǵy ózine ózi qyzmet kórsetý aımaǵynan onlaın ótinim berýge bolady. Talǵar aýdanynyń turǵyny Rústem Asımovtyń onlaın-ótinimi az ǵana ýaqyttyń ishinde maquldandy. Endi ol aldaǵy 5 jumys kúniniń ishinde nesıesine qol jetkizedi.
«Men Talǵar aýdanynan keldim. Osy Aýyl sharýashylyǵyn qarjylaı qoldaý qorynan buryn bir ret nesıe alǵanmyn. Ol nesıeni jaýyp tastap, mine ekinshi ret taǵy nesıe alýǵa onlaın-ótinim berip otyrmyn. Aldyńǵy nesıeni alarda kóp qujat jınaǵanmyn. Osy jol bári ońaı, tek elektrondy tsıfrlyq qoltańba bolsa kompıýterde otyryp-aq kóp jumysty tyndyrýǵa bolady eken. Mamandar keńes berip, kómektesti. Negizi eshqandaı qıyndyǵy joq eken», - deıdi nesıege iri qara mal satyp alýdy josparlap otyrǵan kásipker.
Mal sharýashylyǵymen aınalysqysy kelgen kásipker «Eńbek» baǵdarlamasynyń talaptaryna sáıkes bolýy shart. Eger kásipti endi bastap jatqan bolsa, bıznes negizderin oqyǵany týraly sertıfıkaty men jumyspen qamtý ortalyǵynan alǵan joldamasy bolýy kerek.
«Eger siz Aqmola nemese Almaty oblysynyń turǵyny bolsańyz jáne mal sharýashylyǵyn damytýǵa qarjy alǵyńyz kelse, www.online.fagri.kz portalyna kirińiz jáne kelisimge qol qoıyńyz. «Jańa ótinim jasaý» batyrmasyn basyp, ótinimdi jeke kabınet arqyly jiberińiz. Júıe memlekettik derekqordan aqparat suratý arqyly azamattyń nesıe alý múmkindigi men senimdiligin tekseredi. Oń nátıje bolǵan jaǵdaıda «jalǵastyrý» batyrmasy iske qosylady. «Kepildikti qamtamasyz etý» bóliminde kepilge qoıýdy josparlaǵan múlikke qatysty derekterdi engizińiz, júıe múliktiń naryqtyq qunyn esepteıdi. Usynylǵan kepildik múlki jetkilikti bolǵan jaǵdaıda júıe kepildikti qamtamasyz etý jónindegi qujattarmen oblystyq fılıalǵa júginý múmkindigi týraly habarlamany kórsetedi», - deıdi «Aýyl sharýashylyǵyn qarjylaı qoldaý qory» AQ Nesıeleý departamenti dırektorynyń orynbasary Armat Baızaqov.
Qujattardy nesıe menedjerine tapsyrǵannan keıin siz ózińizdiń jeke kabınetińizden ótinimińiz boıynsha júrgizilip jatqan jumystyń qaı deńgeıde ekenin baqylaı alasyz. Ýákiletti organ oń sheshim shyǵarǵan jaǵdaıda nesıe shartyn jasasý úshin Aýyl sharýashylyǵyn qarjylaı qoldaý qorynyń oblystyq fılıalyna barýyńyz kerek.
Ótinimdi aldyn ala maquldaý sheshimi 10-15 mınýt aralyǵynda qabyldanady. Al, ótinimdi odan ári qaraý merzimi 15 kúnnen 5 jumys kúnine deıin qasqardy.
