Sharýalarǵa tıesili malǵa sáıkestendirý júrgizýdi bekitý normalary qarastyrylyp jatyr - AShM
ASTANA. KAZINFORM — QR Aýyl sharýshylyǵy mınıstrligi maldyń kimge tıesili ekenin anyqtaý úshin syrǵa nemese chıp salý talabyn qatańdatýǵa qatysty túsinik berdi.
Atap aıtqanda, Aýyl sharýashylyǵy mınıstriniń 2020 jylǵy 29 sáýirdegi № 145 buıryǵymen bekitilgen maldy jaıýdyń úlgilik qaǵıdalarynyń 8-tarmaǵyna sáıkes, adamdardyń qadaǵalaýynsyz júrgen mal qaraýsyz júrgen bolyp esepteledi jáne ıesi anyqtalǵanǵa deıin ýaqytsha ustaý úshin qorajaılarǵa qamalady. Qaraýsyz júrgen maldy ustaý, ıelerine qaıtarý tártibi, sondaı-aq ıeleriniń jaýapkershiligi Azamattyq kodekstiń 246-babyna sáıkes aıqyndalady.
- Qazirgi ýaqytta Úkimet qorytyndysynda Parlament depýtattary bastamashy bolǵan «Qazaqstan Respýblıkasynyń keıbir zańnamalyq aktilerine veterınarııa máseleleri boıynsha ózgerister men tolyqtyrýlar engizý týraly» zań jobasyna aýyl sharýashylyǵy kásiporyndaryna, sharýa jáne fermer qojalyqtaryna ózderine tıesili malǵa sáıkestendirý júrgizýdi bekitý normalary qarastyrylyp jatyr, - delingen mınıstrliktiń Kazinform agenttigine bergen jaýabynda.
Buǵan deıin habarlanǵandaı, jaqynda qaraýsyz júrgen mal ıelerine jaýapkershilik kúsheıtiletini málim boldy. Osy turǵyda zańnamaǵa túzetýler engizilip, maldyń kimge tıesili ekenin anyqtaý úshin syrǵa nemese chıp salý máselesinde talap qatań bolatyny aıtyldy. Buǵan jol ústinde jylqy men sıyrdy qaǵyp, kóliktiń apatqa ushyraýy derekteriniń kóbeıýi áser etip otyr. Sonymen qatar sáıkestendirý is-sharalary mal urlyǵynyń aldyn alý maqsatynda jasalmaq.