Sharýalarǵa nesıe berý jeńildetildi
ASTANA. QazAqparat - «Aýyl sharýashylyǵyn qarjylaı qoldaý qory» AQ arqyly nesıe berý úshin aýyl sharýashylyǵy maqsatyndaǵy jeri bolý qajettigi boıynsha talap alynyp tastaldy. Bul týraly QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeevtiń májilismenderdiń depýtattyq saýalyna bergen jaýabynda aıtylǵan, dep habarlaıdy QazAqparat tilshisi.
Eske sala ketsek, osy aıdyń basynda QR Parlamenti Májilisiniń depýtaty Beıbit Mamraev bastaǵan bir top májilismen «Aýyl sharýashylyǵyn qarjylaı qoldaý qory» AQ-nyń nesıeleý shartaryn qaıta qaraýdy surap, Ómirzaq Shókeevke depýtattyq saýal joldaǵan bolatyn. Olar «Bastaý bıznes» baǵdarlamasy boıynsha oqytylyp, jeke kásipker retinde tirkelgen aýyl azamattary atalmysh qordan ústimizdegi jyly mal sharýashylyǵymen aınalysý úshin nesıe ala almaı otyrǵanyn aıtqan edi. Bul saýalǵa Ómirzaq Shókeev kelesideı jaýap berdi.
«Baǵdarlama boıynsha bólingen qarajattardyń qaıtarymdylyǵyna júrgizilgen taldaýdyń negizinde Aýyl sharýashylyǵy mınıstrligi jeke kásipkerlerge nesıe berý sharty tek aýyl sharýashylyǵy maqsatyndaǵy jerleri bolǵan jaǵdaıda ǵana qarastyrylǵan bolatyn. Bul talap nesıe boıynsha bıznes modeldiń ornyqtylyǵyna, sonymen qatar salynǵan qarajattyń ózin-ózi aqtaýyna negizdelgen. Alaıda baǵdarlamanyń áleýmettik sıpatyn eskere otyryp, mınıstrlik osy jyly 11 sáýirde «QazAgro» Holdınginiń enshiles uıymdaryna nesıe berý sharttaryn joldady. Onda jeke kásipkerler úshin aýyl sharýashylyǵy maqsatyndaǵy jerleri bolý qajettigi boıynsha talaptary alynyp tastaldy», - delingen jaýapta.
Mınıstrdiń jaýabyna sáıkes, atalǵan talap tek zákirli kooperatsııanyń qatysýshylary úshin saqtalǵan.
«Qordyń nesıe berý sharttaryn 2018 jylǵy 17 sáýirde Dırektorlar Keńesi qaıta qarady jáne bekitti. Onda Baǵdarlama sheńberinde mal sharýashylyǵyn damytýǵa jáne satyp alýǵa nesıe beriletin nesıelik ónimder boıynsha jeke kásipkerler nysanaly top retinde qosyldy. Osylaısha, qoldanystaǵy sharttar zákirli kooperatsııanyń qatysýshylary bolyp tabylmaıtyn jeke kásipkerler úshin aýyl sharýashylyǵy maqsatyndaǵy jerleri bolmaı, barlyq aýyl sharýashylyǵy janýarlaryn, qustaryn, bal aralaryn ósirýge, sondaı-aq aýyl sharýashylyǵy emes qyzmet túrlerimen aınalysý úshin qaryz alýǵa múmkindik beredi», - delingen jaýapta.
