Sharýalarǵa dızel otyny neshe teńgege satylady – Energetıka mınıstrligi
«2020 jylǵy kúzgi dala jumystaryn júrgizý maqsatynda Energetıka mınıstrligi Aýyl sharýashylyǵy mınıstrligimen birlesip, «2020 jylǵy dala jumystaryna dızel otynyn jetkizý boıynsha oblystardy MÓZ-ge bekitý kestesin» ázirledi. Onyń sheńberinde aýyl sharýashylyǵy taýaryn óndirýshiler úshin qajettilik 395 myń tonna kóleminde bekitildi. Bıylǵy 21 tamyzdaǵy jaǵdaıy boıynsha 26,9% oryndaldy», - dedi N. Noǵaev Úkimet otyrysynda.
Mınıstrdiń aıtýynsha, josparlanǵan 395 myń tonnanyń 106,2 myń tonnasy tıep-jóneltildi. Shildede josparlanǵan 74,6 myń tonnanyń 69,2 myń tonnasy, al tamyzda – josparlanǵan 142,7 myń tonnanyń 37 myń tonnasy tıep-jóneltildi. Bekitilgen keste boıynsha qyrkúıek aıynda 140,8 myń tonna, qazan aıynda – 36,8 myń tonna tıep-jóneltý josparlanǵan. Tıep-jóneltý tólemge sáıkes júrgizilýde.
«2020 jyldyń kúzgi-dala jumystaryn júrgizý úshin dızel otynynyń usynylatyn baǵasy qosymsha qun salyǵyn qosa alǵanda zaýytta tonnasyna 178 000 teńgeni quraıdy nemese lıtrine 147 teńge. Jetkizý men saqtaýdy eskere otyryp, aýyl sharýashylyǵy taýaryn óndirýshiler úshin boljamdy baǵasy MÓZ-den qashyqtyǵyna baılanysty lıtrine 155-169 teńge bolýy múmkin. Janarmaı quıý stantsııasynyń baǵasy – lıtrine 178-den 193 teńgege deıin», - deıdi vedomstvo basshysy.
Aýyl sharýashylyǵy taýarlaryn óndirýshileri úshin dızel otynyna arzandatylǵan baǵany zańdy túrde bekitý mınıstrliktiń quzyryna kirmeıtinin atap ótý qajet.
«Aýyl sharýashylyǵy qajeti úshin dızel otynynyń arzandatylǵan quny janar-jaǵarmaı naryǵynyń qatysýshylarymen kelisim boıynsha anyqtalady. Ári ony munaı ónimderiniń resýrs ıeleri óz erkimen belgileıdi. Mınıstrlik kúzgi dala jumystaryn talapqa saı ótkizý úshin jan-jaqty sharalardy qabyldaýda», - dedi Nurlan Noǵaev.
