Sharýalarǵa dızel otyny qanshadan berilip jatyr

ASTANA. KAZINFORM – Energetıka mınıstrligi bıylǵy egis naýqanyna 401 myń tonna arzandatylǵan dızel otynyn bóldi. Sharýalar úshin túpkilikti baǵa lıtrine 254 teńgege beriledi, bul naryqtan 20%-ǵa arzan. Bul týraly sala mınıstri Erlan Aqkenjenov aıtyp berdi.

− Bıyl 30 qańtarda Energetıka jáne Aýyl sharýashylyǵy mınıstrlikteri «2025 jylǵy kóktemgi egis jumystaryna 400,9 myń tonna dızel otynyn jetkizý kestesin» bekitti. Dızel baǵasy – 1 lıtri úshin qosylǵan qun salyǵymen birge 254 teńge, bul janarmaı quıý stantsııasyndaǵy bólshek saýda baǵasynan shamamen 20%-ǵa arzan, − dedi mınıstr Úkimettiń búgingi otyrysynda.

Sonymen birge, dızel otyny qozǵalysynyń ashyqtyǵy men baqylaýyn qamtamasyz etý úshin jeke PIN-kodtar alyndy; otandyq dızel sary, kók jáne qyzyl tústerge boıalyp, elektrondy shot-faktýra júıesine dızel otyny úshin bólek vırtýaldy qoıma qurylǵan.

− Sonymen, kóktemgi dala jumystaryna qajettilik 400,9 myń tonna dızeldi quraıdy. Aqpan-sáýir aılarynda kóktemgi dala jumystaryna 215 myń tonna nemese dızel otyny jalpy kóleminiń 54 %-y jóneltildi. Sharýalardy ýaqytyly qamtamasyz etý úshin jetkizýshi munaı ónimderin satyp alý-satý sharty jasalǵan sátten bastap 10 jumys kúninde tólemdi jedeldetýi qajet. Sharýalarǵa dızel jóneltý basym negizde júzege asyrylady jáne turaqty baqylaýda bolady, − dedi E. Aqkenjenov.

Buǵan deıin Energetıka mınıstri eldegi janarmaı qory týraly málimet bergen edi.