Sharýalarǵa beriletin arzan dızel qalaı qadaǵalanady
ASTANA. KAZINFORM – Aýyl sharýashylyǵy taýarlaryn óndirýshilerge arnalǵan arzandatylǵan dızel otyny arnaıy túske boıalady. Bul týraly búgin Úkimet otyrysynan keıingi brıfıngide Erlan Aqkenjenov aıtty.
- Mınıstrlik munaı, munaı ónimderin, gazdy jáne elektr energııasyn óndirý salasyndaǵy saıasatty júzege asyratyn organ sanalady. Munaı ónimderiniń aınalymy Qarjy mınıstrliginiń quzyretine bekitilgen. Degenmen bul suraqqa da jaýap bere keteıin. Arnaıy PIN-kodtar bekitilgen. Aýyl sharýashylyǵy taýaryn óndirýshiler úshin jóneltiletin dızel otynynyń árbir partııasyna ilespe júkqujattarda biregeı arnaıy PIN-kod kórsetiledi. Bul kod dızel otynynyń qozǵalysyn sońǵy tutynýshyǵa deıin baqylaýǵa múmkindik beredi, - dedi mınıstr tilshiler saýalyna oraı.
Sonymen qatar ol elimizdegi úsh munaı óńdeý zaýyty sharýalarǵa arnalǵan dızel otyny arnaıy túske boıalatynyn aıtty.
- Úsh zaýytta otyn arnaıy túske, ıaǵnı aýyl sharýashylyǵy taýaryn óndirýshilerge aıtarlyqtaı jeńildikpen beriletin otyn arnaıy túske boıalady. Ony birden ajyratýǵa bolady. Eger tutynýshylardyń birine osyndaı boıalǵan otyn kezdesse, onyń aýyl sharýashylyǵy taýaryn óndirýshilerge arnalǵan otyn ekenin birden túsinedi, - dedi Erlan Aqkenjenov.
AI-95 jáne AI-98 benzıniniń sapasyna qatysty tekserý bastalǵanyn jazǵan edik.
