Sharýalarǵa arnalǵan dızel naryqtaǵy baǵadan 15% arzan bolady – mınıstr

ASTANA. KAZINFORM – Kóktemgi egin jumystary úshin sharýalarǵa dızel otyny janar-jaǵarmaı stantsııalarynan 15% arzanyraq baǵamen beriledi. Bul týraly Energetıka mınıstri Erlan Aqkenjenov Úkimet otyrysynda aıtty.

Jyl basynda Energetıka jáne Aýyl sharýashylyǵy mınıstrlikteri «2026 jylǵy kóktemgi dala jumystaryna 402 myń tonna dızel otynyn berý kestesin» bekitken edi.

– Sharýalarǵa arnalǵan dızel otyny qozǵalysynyń ashyqtyǵy men baqylaýyn qamtamasyz etý úshin jeke PIN-kodtar alyndy, dızel túsi sary, kók jáne qyzylǵa boıaldy, elektrondyq shot-faktýra júıesine dızel úshin bólek vırtýaldy qoıma qurý sharalary qabyldandy. Bul sharalar munaı jetkizýshilerdiń dızel otynyn operatorlarǵa maqsatty túrde naqty jetkizýdi qamtamasyz etedi, – dedi Energetıka mınıstri.

Jóneltý kólemi aýyl sharýashylyǵy taýarlaryn óndirýshilerdiń ótinimderine, tólem júrgizýine jáne vagondardy usynýyna baılanysty bolmaq.

Aıta keteıik, 23 aqpandaǵy jaǵdaı boıynsha dızel baǵasy Astanada lıtrine 327-333 teńge, Almatyda – lıtrine 330-335 teńge jáne Shymkentte – lıtrine 333 teńgeden satylyp jatyr.