Sharýalarǵa agrotýrızmmen aınalysýǵa ruqsat berilmek

ASTANA. KAZINFORM – Úkimet otyrysynda fermerlerge óz ýchaskelerinde agrotýrızmmen aınalysý quqyǵyn berý máselesi qaraldy. Tolyǵyraq Týrızm jáne sport mınıstri Erbol Myrzabosynov aıtyp berdi.

- Úkimettiń keńeıtilgen otyrysynda Memleket basshysy týrızmdi damytý boıynsha birqatar tapsyrma berdi. Elimizdiń barlyq óńiri týrızmdi damytýda úlken áleýetke ıe. Alaıda ony tejep otyrǵan birqatar másele bar. Osyǵan baılanysty salany odan ári damytý maqsatynda zańnamaǵa ózgerister engizilip jatyr. Tıisti zań jobasy Májiliste qaralyp jatyr. Ákimdikterge eldi mekenderden tys jerlerde, onyń ishinde ulttyq parkter aýmaǵynda týrıstik ınfraqurylym salý boıynsha zańnamalyq ókilettikter berý. Bul negizgi bastamalardyń biri. Atalǵan másele egjeı-tegjeıli pysyqtaldy, - dedi Erbol Myrzabosynov Úkimet otyrysynda.

Mınıstrdiń málimdeýinshe, atalǵan bastama ınfraqurylymdy damytýdy qamtamasyz etedi.

- Óńirlerde týrızmdi damytýǵa basymdyq berý úshin jańa quzyretpen qatar jeke týrızm basqarmalaryn qurý máselesin qarastyrý qajet. Qazir tek bes óńirde jeke basqarma bar, taǵy eki óńirmen pysyqtalyp jatyr. Fermerlerge óz ýchaskelerinde agrotýrızmmen aınalysý quqyǵyn berý. Qazir elimizde 200 myńnan astam sharýa qojalyǵy bar. Bul shara aýyl turǵyndary úshin qosymsha jumys oryndaryn qurýǵa, aýyldyq aýmaqtardyń ál-aýqatyn arttyrýǵa múmkindik beredi. Týrıstik jáne rekreatsııalyq qyzmetti júzege asyrý úshin ulttyq parkterde jerdi jalǵa berý merzimin 49 jylǵa deıin ulǵaıtý boıynsha zańnamalyq jumys júrgizilip jatyr. Bul ekotýrızmdi damytý úshin ınvestıtsııa tartýǵa jáne ınfraqurylymdy damytýǵa múmkindik beredi, - deıdi ol.

Eske salsaq, ótken jyly elimizde týrızm salasyndaǵy negizgi kapıtalǵa salynǵan ınvestıtsııa kólemi 947,5 mlrd teńge boldy.