Sharýalarǵa aqshalaryn bermeı, basshylyǵy jumystan ketken «QazMaqta» AQ qaryzyn tóledi
ShYMKENT. QazAqparat - Ońtústik Qazaqstan oblysy, Maqtaral aýdanyndaǵy daýly másele óz sheshimin tapty. «Qazmaqta» korporatsııasy maqtaraldyq sharýalardyń qaryzyn tolyqtaı qaıtardy, dep habarlaıdy QazAqparat tilshisi.
Maqtaral aýdany ákimdigi baspasóz qyzmetiniń málimetinshe, «QazMaqta» AQ 307 sharýa aldynda 323,4 mln teńge qaryzynan tolyq qutyldy. Atalǵan zaýyt sońǵy qalǵan 113,7 mln teńgeni 44 sharýaǵa tólep bitken.
Eske salaıyq, ótken jyldyń 15 jeltoqsanynda «QazMaqta» AQ-ǵa maqta shıkizatyn ótkizip, qarjysyn ala almaı júrgen bir top sharýa Maqtaral aýdany ákimdigine aryzdanyp kelgen bolatyn. Keıinnen ákimdik ókilderi korporatsııanyń dırektoryna kóterilgen máseleni sheshý qajettigi jóninde hat joldaǵan. Alaıda, «QazMaqta» basshylyǵy qarjy máselesi sheshilmeı jatqandyǵy jóninde aýyzsha habar berip, aqshany tólemegen. Osydan keıin sharýalar aǵymdaǵy jyldyń aqpanynda aýdandyq ishki ister basqarmasyna aryzdandy.
Tártip saqshylary korporatsııaǵa qatysty Qylmystyq kodekstiń 190-baby, 4-bóliginiń 2-tarmaǵy («Alaıaqtyq») boıynsha is qozǵap, jedel tergeý sharalaryn júrgizdi. Daýly máselege oblys ákimi Janseıit Túımebaev pen oblys prokýrory Nurǵalym Ábdirov aralasyp, jaǵdaıdy óz baqylaýyna alǵan bolatyn.
Sondaı-aq osy jaǵdaıdan keıin esepshiden basqa zaýyttyń basshylyq quramy jumystan bosatylǵan edi.
Osylaısha atqarylǵan jumystardyń barysynda 15 aqpanda sharýalardyń 60 mln teńgesi tólense, 21 naýryz kúni 150 mln teńge qarjysy qaıtaryldy. Qalǵan 44 sharýanyń qarjysy 5 sáýir kúni tolyǵymen tólenip, qazirgi tańda sharýalarǵa bereshek tolyǵymen tólendi.
Óz kezeginde maqtaly óńirdiń sharýalary máseleniń sheshilýine tikeleı yqpal etken oblys ákimi men oblys prokýroryna rızashylyqtaryn aıtýda.
